Read Batak Karo MASMUR 73 Bible Online

MASMUR 73 - Batak Karo bible

MASMUR 73

¹I bas Asap nari. Mehuli kal Dibata man kalak si tutus, man kalak si bersih ukurna.

²Tapi menam aku jongkang, menam aku celus,

³Perbahan mengga ateku kempak kalak megombang, tupung kuidah kesangapen kalak jahat.

⁴La ia pernah sakit, badanna megegeh dingen sehat.

⁵La inanamina susah, la ia gulut bagi kalak si deban.

⁶E me sabapna maka ia megombang, dingen usur erbahan jahat.

⁷Pusuhna dem alu kejahaten, perukurenna lalap sampur alu si jahat.

⁸Itawa-tawaina kalak dingen jahat cakapna, alu megombang idehkenna atena kalak si deban.

⁹Megombang cakapna kerna Dibata si ni Surga, itokohina kalak i doni enda;

¹⁰seh maka bangsa Dibata pe ngikutken ia, jenari tek man ranan kalak enda.

¹¹Nina, “Labo ieteh Dibata, labo ieteh si Meganjang e.”

¹²Bage me adi kalak jahat, lalap ia reh bayakna, ipesenang-senangna dirina rusur.

¹³Percuma kujaga diringku bersih, la erguna kusirangken dosa.

¹⁴Tep-tep erpagi-pagi nge aku iukum tep-tep karaben aku isiksa.

¹⁵Adi bage min ndai perukurenku enggo kupersilahang si biak bangsaNdu.

¹⁶Kuusahaken gelah aku ngerti, tapi meserasa kal ngantusisa.

¹⁷Dungna kenca aku bengket ku Rumah Dibata, i je maka kueteh kedungen kalak jahat.

¹⁸ItamakenNdu ia i bas dalan medalit, ibahanNdu guling, bene me ia.

¹⁹Perper me ia sekali engkumirep saja, keri radas kena mara.

²⁰Desken nipi si bene erpagi-pagi, o Tuhan bage me perlesap kalak jahat tupung Kam keke.

²¹Tupung ceda ateku, ngenanami pagitna nggeluh enda,

²²bodoh aku, la kuerti, bagi asuh-asuhen aku i adepenNdu.

²³Tapi lalap nge Kam kudeheri, icikepNdu tanku si kemuhen.

²⁴Salu pedah-pedahNdu ipinpinNdu aku, iberekenNdu ateNdu kemulian man bangku.

²⁵Adi la Kam, ise kin sikerajangenku i Surga? La lit kai pe ateku ngena i doni seakatan Kam.

²⁶Aminna pe tuk ukur ras dagingku, Kam kap gegehku, o Dibata. Kam kap lalap si kuperluken.

²⁷Cilaka me kalak si nadingken Kam, ilesapkenNdu me kalak si la setia man banNdu.

²⁸Tapi adi aku, senang kal kuakap, adi rembak ras Dibata. TUHAN Dibata kubahan man inganku cicio, gelah banci kuberitaken kerina perbahanenNa.