Read Batak Karo MASMUR 74 Bible Online

MASMUR 74 - Batak Karo bible

MASMUR 74

¹Ende-enden Asap. O Dibata, rasa lalap kin kami itadingkenNdu? Engkai maka Kam merawa man bangsaNdu?

²Ingetlah bangsa si ipilihNdu ndube, bangsa si ibebaskenNdu gelah jadi bangsaNdu. Ingetlah Deleng Sion, i je kap Kam ringan.

³Dalani min ingan-ingan si enggo iruntuhken musuh, enggo ikernepkenna si nasa lit i bas RumahNdu.

⁴Imbang-imbangNdu enggo ersurak i bas RumahNdu, dingen majekken bendera tanda kemenangen i je.

⁵Desken tukang si nabah batang kayu, itabahna kayu salu kapakna.

⁶Icedaina kerina ukiren kayu, alu kapak ras martel.

⁷Icilukna RumahNdu ngadi-ngadi radas, iliamina ingan nembah man baNdu.

⁸Atena maka kerina kami italukenna, jenari icilukina kerina ingan persembahen i negeri enda.

⁹Nabi-nabi ras tanda kuasa lanai nari lit, sekalak pe la lit si meteh ndigan enda ngadina.

¹⁰Ngayak ndigan, o Dibata, musuhNdu nawai Kam? Rasa lalap kin ia nggombangi gelarNdu?

¹¹Engkai maka la kami isampatiNdu? Engkai maka ipelepasNdu saja kami?

¹²Kam kap raja kami nai-nai nari, enggo rusur ikeliniNdu kami, o Dibata.

¹³ItakaNdu lawit alu kuasaNdu nganga lawit ipekpekNdu takalna seh pecah. [74†]

¹⁴Takal Lewiatan iperperken Kam, ijadikenNdu ia jadi pangan rubia-rubia kerangen. [75†]

¹⁵Kam erbahanca maka turah ulu lau ras maler lau mbelin, ikerahiNdu lau si la pernah kerah.

¹⁶Kam njadikenca suari ras berngi, netapkenca ingan matawari ras bulan.

¹⁷Baleng-baleng doni enda itentukenNdu, ijadikenNdu paksa perlego ras perudan.

¹⁸O TUHAN, inget min uga Kam pencekuraki musuh-musuh e, bangsa si la erdibata naling-naling gelarNdu.

¹⁹Ola endeskenNdu bangsaNdu si la ergegeh e ku bas tan kalak si kejam. Ola min kami asa lalap ilupakenNdu, bangsaNdu si musil-musil.

²⁰Inget min perpadanen si ibahanNdu man kami, sabap i bas tep-tep ingan si gelap i bas negeri enda, i je kalak ngelakoken si jahat.

²¹Ola pelepas mela iakap kalak si tertindih, gelah kalak musil ras mesera muji Kam.

²²Kekeken o Dibata, bela min perkaraNdu sabap gedang-gedang wari Kam icekuraki kalak, si la erdibata.

²³Ola min kam lupa sora imbangNdu si megombang e, sabap reh gejekna ibahanna lalap.