Read Batak Karo MASMUR 76 Bible Online

MASMUR 76 - Batak Karo bible

MASMUR 76

²Dibata itandai kap i Juda, i Israel mbelin gelarNa.

³Jerusalem kap inganNa tading rumahNa e me kap Deleng Sion.

⁴I je iripukkenNa kerina perkakas perang, lanai lit panah si erndilap, ampang-ampang ntah pedang.

⁵Mbelin kal kemulianNdu, o Dibata, mulian asangken deleng-deleng si enggo lit nai-nai nari.

⁶Kalak si la meteh mbiar enggo irampasi, badeh pertunduhna, lanai ia keke. Tentera-tentera si mbisa, enggo bene kinimbisanna.

⁷O Dibata nu Jakup, iserangNdu ia, e maka mate kerina kuda ras si ngersaksa.

⁸Kerina kalak mbiar man baNdu, o TUHAN, adi keke rawaNdu, ise kin ngasup nahankenca?

⁹I das langit nari iberitakenNdu keputusenNdu, sinik doni enda perban biarna,

¹⁰tupung Kam keke lako melasken keputusen, guna nelamatken kalak si tertindas i doni.

¹¹Rawa manusia pe tama pujin man baNdu iba rawa manusia e pe icekemNdu.

¹²Sehkenlah kai si enggo ipadankenndu man TUHAN Dibatandu; kerina bangsa si i sekelewetna, ibabanalah persembahen man Dibata si medolat.

¹³Ipeterukna penguasa si meganjang rukur, mbiar raja-raja doni ibahanNa.