Read Batak Karo MASMUR 77 Bible Online

MASMUR 77 - Batak Karo bible

MASMUR 77

²Alu sora megang kulebuh Dibata, alu sora megang erlebuh aku, jenari ibegikenNa aku.

³Tupung mesera, ertoto aku man Tuhan. Gedang-gedang berngi kudadaken tanku ertoto, tapi la jumpa aku pengapul.

⁴Adi kuinget me Dibata, ndehereng aku, adi kuukuri, reh getemna pusuhku.

⁵ TUHAN erbahanca matangku la tertunduh gedang-gedang berngi, aru kal ateku seh maka lanai kal aku beluh ngerana.

⁶Kuinget wari-wari si enggo lepas, kuukurken tahun-tahun si nai.

⁷Tupung paksa berngi rukur-rukur aku; dingen nungkun-nungkun i bas ukurku.

⁸“Rasa lalap nge ndia kami itulak Tuhan? Lanai nge ndia ateNa mekuah ngenen kami?

⁹IngadikenNa kin ndia ngkelengi kami? La ndia itepatina padanNa?

¹⁰Enggo kin ndia lupa Dibata ngkelengi kita? Nembeh ndia Ia, maka lanai mekuah ateNa kita?”

¹¹E maka ningku, “Si ceda kal ate, e me, adi Dibata si Meganjangna lanai erkuasa.”

¹²Kuinget me perbahanen-perbahanenNdu, o TUHAN, kuinget perbahanenNdu si mejin i bas paksa-paksa si nai.

¹³Kuinget-inget kerina perbahanenNdu, kuukuri perbahanenNdu si mbelin.

¹⁴O Dibata, badia kap kerina perbahanenNdu, la lit dibata si deban si seri belinna ras Kam.

¹⁵Kam kap Dibata si ngelakoken tanda kuasa si mbelin, icidahkenNdu kuasaNdu i tengah-tengah bangsa-bangsa.

¹⁶Salu gegehNdu ipulahiNdu bangsaNdu, kesusuren Jakup ras Jusup.

¹⁷Ngidah kam, o Dibata, lau jadi gentar, lawit si mbagesna pe nggirgir.

¹⁸Embun nurcurken udan, lenggur erdegur i langit nari, kilap erkencir ku jah ku jenda.

¹⁹Lenggur erdegur, kilap ernala nerangi doni, doni enda mundu-undu dingen nggirgir.

²⁰Kam erdalan i babo galumbang, ibentasiNdu lawit si mbelang, tapi la tereteh bekasNdu.

²¹Bali ras permakan, ibabaiNdu bangsaNdu, si ipinpin Musa ras Harun.