Read Batak Karo MASMUR 80 Bible Online

MASMUR 80 - Batak Karo bible

MASMUR 80

¹Masmur kesaksin Asap.

²O permakan Israel, dengkehken min kami, dengkehkenlah si permakan rarasen Jusup. Kam si kundul i das kerubim, cidahkenlah sinalsalNdu. [98†]

³Ilebe-lebe Eperaim, Benyamin ras Manase, pekekelah kuasaNdu, jenari reh Kam nampati kami.

⁴O Dibata, baba min kami mulih, cidahken man kami perkuah ateNdu maka kami terkelin.

⁵O TUHAN si Mada Kuasa, asa kai nari dekahna ateNdu nembeh ndengkehken pertoton bangsaNdu?

⁶Kiniseran iberekenNdu jadi pangan kami, dingen sampur iluh man inemen kami.

⁷IpelepasNdu bangsa-bangsa sekelewet kami rubat kerna taneh kami, jenari kami iguro-guroken musuh kami.

⁸O Dibata si Mada Kuasa, baba kami mulih! Cidahken min perkuah ateNdu man kami maka kami terkelin.

⁹BangsaNdu desken batang anggur, si ipiserNdu i Mesir nari. Bangsa-bangsa si deban ipelawesNdu, jenari isuankenNdu batang anggur i negerina.

¹⁰I pesai Kam taneh man ingan nuankenca jenari rurat enteguh ia, dingen idemina negeri e.

¹¹Ilinggemina deleng-deleng, itutupina dahan-dahanna batang ingul si mbelin.

¹²Dahanna njurjur seh ku Lawit Tengah, pucuk-pucukna seh ku Lau Eprat.

¹³O Dibata ngkai maka isontarkenNdu bidena, seh maka kerina kalak si mentas banci muat buahna?

¹⁴Wili nungke-nungke i je ngayak ceda, jenari rubia-rubia si meliar pe manganisa.

¹⁵O Dibata si Mada Kuasa, mulihlah, tatap min i Surga nari, reh Kam engkelini bangsaNdu.

¹⁶Mari kelini peken anggur si enggo isuanNdu ndube. Batang anggur si nguda, si megegeh ibahanNdu perturahna.

¹⁷Enggo itabah dingen iciluk musuh, kernepkenlah musuh kami alu rawaNdu.

¹⁸Kawali min bangsa si enggo ipilihNdu, bangsa si enggo ijadikenNdu bage gegehna.

¹⁹Gelah lanai kami nilah i bas Kam nari, kawali min kesah kami, maka ipuji kami Kam.

²⁰O TUHAN Dibata si Mada Kuasa, baba min kami mulih, cidahken man kami perkuah ateNdu maka kami terkelin.