Read Batak Karo MASMUR 84 Bible Online

MASMUR 84 - Batak Karo bible

MASMUR 84

¹Masmur anak-anak Korah.

²Andiko, keleng kal ateku RumahNdu, o TUHAN si Mada Kuasa.

³Andiko, merincuh kal aku ku je! Metedeh kal ateku Rumah TUHAN! Tendingku ras dagingku ersurak nandangi Dibata si nggeluh.

⁴Sedangken perik tuan pe lit rumahna, kalimpines enggo dat asar. Itamakenna anakna i deher batar-batarNdu, TUHAN si Mada Kuasa, Rajangku dingen Dibatangku.

⁵Seh kal sangapna kalak si tading i RumahNdu, banci ia lalap rende muji Kam.

⁶Sangap kal kalak si daten gegeh i bas Kam nari, si ertedeh ate ndahi Deleng Sion.

⁷Sanga erdalan ia, mentasi berneh Baka si kerah, reh me udan selaku pasu-pasu i bas Dibata nari, seh maka taneh dem ulu lau dingen tambak-tambak.

⁸Gegehna ertambah-tambah tupung ia erdalan ku Sion, lako ngadap man Dibata nu dibata-dibata.

⁹O Dibata Jakup, dengkehken min pertotonku, O TUHAN Dibata si Mada Kuasa.

¹⁰O Dibata, pasu-pasulah raja kami, raja si ipilihNdu jine.

¹¹Madin sada wari i bas RumahNdu, asangken seribu wari i bas ingan si deban. Madin tedis i bas gerbang Rumah Dibatangku, asangken ringan i bas rumah kalak jahat.

¹²Sabap TUHAN Dibata kap matawari ras ampang-ampang si enteguh, iberekenNa man banta kehamaten ras lias ateNa. La ia rahan-ahan mereken si mehuli, man kalak si ngelakoken si ngena ateNa.

¹³O TUHAN si Mada Kuasa, malem kal ate kalak si tek man baNdu.