Read Batak Karo MASMUR 86 Bible Online

MASMUR 86 - Batak Karo bible

MASMUR 86

¹Pertoton Daud. O TUHAN, begiken min pertotonku, aloi min aku, sabap musil janah medanggel kal aku.

²Kawali min geluhku erkiteken keleng ateku man baNdu, kelini min aku, sabap aku suruh-suruhenNdu tek kap man baNdu.

³Gedang-gedang wari aku ertoto man baNdu, Kam kap Dibatangku, mekuah min ateNdu.

⁴O TUHAN, periah min ukur suruh-suruhenNdu, man baNdu kupenangkih pertotonku.

⁵Sabap mehuli kap Kam man kami dingen nggit ngalemi, kalak si erlebuh man baNdu tetap ikelengiNdu.

⁶Perdiateken min pertotonku, o TUHAN, dengkehken min sorangku mindo penampat.

⁷Tupung aku i bas kesuhsahen, erlebuh aku man baNdu, sabap ialoiNdu kap aku.

⁸O Tuhan, la lit dibata si bali ras Kam, la lit si ngasup erbahan bagi si ilakokenNdu.

⁹Kerina bangsa si enggo itepaNdu, o TUHAN, reh nembah man baNdu jenari ipujina gelarNdu. [102†]

¹⁰Sabap mbisa kal Kam dingen mejin KuasaNdu. Kam kap ngenca Dibata.

¹¹Ajari aku nehken peratenNdu, TUHAN, gelah kulakoken e alu tutus. Ajari aku ngendesken diri man baNdu, alu bulat ukurku.

¹²Kukataken bujur man baNdu, alu bulat ukurku. O Tuhan Dibatangku, kumuliaken gelarNdu si mbelin seh rasa lalap.

¹³La tanggung belinna keleng ateNdu bangku, enggo ikeliniNdu aku i bas lubang kubur nari.

¹⁴O Dibata, kalak si meganjang rukur enggo reh ngelawan aku, kalak gutul-gutul munuh aku atena; e me kalak si la mperdiateken Kam.

¹⁵Tapi Kam o TUHAN, Kam Dibata si perkuah ras melias. Kam lalap saber dingen tetap keleng ateNdu ras kesetianNdu.

¹⁶Perdiateken, dingen mekuah min ateNdu aku, bere gegeh dingen kelini min aku. Sabap bagi ulina nandengku ngidangi Kam, bage ka nge ulina perbahanenku man baNdu.

¹⁷Cidahken min kiniulinNdu bangku, gelah mela iakap kalak si ernembeh ate bangku, tupung idahsa maka kam, TUHAN, enggo nampati dingen ngapuli aku.