Read Batak Karo MASMUR 88 Bible Online

MASMUR 88 - Batak Karo bible

MASMUR 88

¹Masmur anak-anak Korah; ende-enden pengajaren Heman kalak Esrahi.

²O TUHAN Dibata si engkelini aku gedang-gedang wari aku erlebuh man baNdu, janah tupung berngi, reh aku ngadap man baNdu.

³Begiken min pertotonku, dengkehken min pingko-pingkongku.

⁴Enggo besur aku ngenanami kiniseran, kematenku enggo ndeher.

⁵Enggo aku bali ras kalak si nandangi mate, kerina gegehku enggo bene.

⁶Aku itadingken i tengah-tengah kalak mate, bagi kalak si terbunuh terdang aku i bas kuburen, desken kalak si lanai pernah iingetNdu. Aku enggo sirang ras penampatNdu.

⁷IambekkenNdu aku ku bas lubang si mbages, ku bas kelbung si mbages dingen gelap.

⁸Alu rawaNdu idehkenNdu aku, e maka getem kal aku, itamburi galumbangNdu.

⁹Teman-temanku ipedauhNdu i bas aku nari, ibahanNdu maka ciga atena man bangku, terkepung aku lanai banci pulah.

¹⁰Gelap matangku perban kiniseran e, gedang-gedang wari erlebuh aku man baNdu, o TUHAN, janahku ertoto, kuangkat tanku.

¹¹IlakokenNdu denga kin tanda kuasaNdu man si mate? Banci denga kin ia keke dingen muji Kam?

¹²Icakapken denga kin keleng ateNdu i bas kuburen-kuburen? Ipuji denga kin Kam i bas kalak mate?

¹³Lit denga kin si ngidah tanda kuasaNdu i bas si gelap? tah pe kiniulinNdu i bas negeri kalak si enggo ilupaken?

¹⁴O TUHAN, man baNdu saja aku erlebuh mindo penampat tep-tep erpagi-pagi aku ertoto man baNdu.

¹⁵O TUHAN, ngkai maka aku itadingkenNdu. Engkai maka aku itundalkenNdu.

¹⁶Kitik-kitikku nari mesui kal ateku, narus-narus mate, la aku ngasup ngaloken ukumen si iberekenNdu.

¹⁷Getem aku perban rawaNdu si mejin, pengukumNdu si mberat ngeripukken aku.

¹⁸Seri ia ras banjir, ikepungna aku, tep-tep wari aku ikelewetina arah kerina dampar.

¹⁹Teman-teman kekelengenku ipedauhNdu i bas aku nari, e maka kegelapen nari nge jadi temanku.