Read Batak Karo MASMUR 89 Bible Online

MASMUR 89 - Batak Karo bible

MASMUR 89

¹Ende-enden si ikarang Etan kalak Esrahi. [103†]

²O TUHAN rasa lalap ateku ngendeken keleng ateNdu si tetap. KesetianNdu kuberitaken, man kerina kesusuren.

³Sabap keleng ateNdu tetap rasa lalap, kesetianNdu nteguh bagi langit.

⁴Nindu, “Enggo Kubahan iketen padan ras kalak si Kupilih, enggo Aku ersumpah man Daud suruh-suruhenKu.

⁵Kesusurenndu tetap rasa lalap jadi raja, kursi kinirajanndu Kukawali rasa lalap.” [104†]

⁶O TUHAN, perbahanenNdu si mejin ipuji i Surga, pertetapNdu iendeken perpulungen si badia.

⁷I awang-awang pe la lit si bali ras Kam o TUHAN, la lit mahluk Surga si seri ras TUHAN.

⁸Kam ihamati perpulungen si badia, dingen kerina ia malang man baNdu.

⁹O TUHAN Dibata si Mada Kuasa, la lit si seri ganjangna ras Kam, i bas kai pe o TUHAN Kam megegeh dingen tetap.

¹⁰IkuasaiNdu lawit si rugup-ugup, ipetenengNdu galumbang si merawa.

¹¹Rahap, naga lawit e ibunuh dingen iripukkenNdu, alu tanNdu si megegeh italukenNdu musuh-musuhNdu.

¹²Lawit ras doni Kam kap empuna, doni ras isina kerina kap tinepaNdu.

¹³Kam kap njadiken Utara ras Selatan, Deleng Tabor ras Hermon ersurak kerna Kam.

¹⁴Andiko belinna kuasaNdu! Andiko belinna gegehNdu.

¹⁵Keadilen dingen kebujuren kap palas kinirajanNdu, keleng ate dingen kesetian teridah i bas kerina perbahanenNdu.

¹⁶O TUHAN, sangap kal bangsa si nembah man baNdu alu rende, kiniulinNdu nalsali geluhna.

¹⁷Erkiteken Kam, dem i bas ia keriahen, kiniulinNdu ipujina gedang-gedang wari.

¹⁸Kam merekenca man kami kemenangen si mbelin, erkiteken kiniulinNdu nge maka kami menang.

¹⁹Sabap Kam o TUHAN, enggo milih sekawal kami, Kam, o Dibata si badia Israel, enggo nangkuhken raja kami.

²⁰Nuria nari i bas sada pengenehenen, ngerana Kam man suruh-suruhenNdu si patuh niNdu, “Enggo Kusampati kalak si mbisa, enggo Kubereken mahkota man kalak si Kupilih i bas bangsa e nari.

²¹Enggo Kujumpai Daud suruh-suruhenku, Kutangkuhken ia alu minak si badia. [105†]

²²Kuasangku si engkawali ia lalap, gegehKu si pegegehi ia.

²³La ngasup musuh ngimbangi ia, kalak jahat la ngasup naluken ia.

²⁴Aku si ngkernepken kerina imbang-imbangna, Kubunuh ise saja si ernembeh ate man bana.

²⁵Aku setia dingen tetap ngkelengi ia, jenari erkiteken gelarku Kubereken kemenangen man bana.

²⁶Aku si pebelangken kerajanna, daerahna menaken i Lawit Tengah nari seh ku Lau Eprat.

²⁷Nina kempak aku, ‘Kam kap Bapangku dingen Dibatangku, Kam kap si kawal dingen si engkelini aku.’

²⁸Ia Kujadiken anakku sintua, i bas kerina raja-raja ia si muliana. [106†]

²⁹Keleng ateKu man bana Kucidahken rasa lalap, dingen perpadanKu man bana tetap rasa lalap.

³⁰Kerajanna tetap kidekah langit lit denga kesusurenna lalap jadi raja.

³¹Tapi adi kesusurenna ngelanggar undang-undangKu, jenari la iikutkenna perentahKu,

³²janah adi mekarus ia nandangi pedahKu, dingen ipersilahangna peraturenKu,

³³kuukum me ia alu ciken ras mara erkiteken kesalahen si ibahanna e, jenari Kubereken man bana kiniseran erkiteken dosana.

³⁴Tapi Daud tetap Kukelengi, dingen perpadanenKu man bana tetap rasa lalap.

³⁵La Kupersilahang perpadanenKu man bana, janah sada pe i bas perpadanenKu e la Kuobah.

³⁶Sekali seh rasa lalap enggo Aku ersumpah i bas gelarKu si badia. Kutera pe la Aku nggit erguak man Daud.

³⁷Kidekah matawari ersinalsal denga kerajanna tetap rasa lalap, dingen kesusurenna jine si ngerajaisa.

³⁸Kujadiken kerajanna tetap desken bulan e me saksi si setia i datas awang-awang.”

³⁹Tapi o TUHAN, genduari keke rawaNdu man raja, kalak si ipilihNdu ibuang dingen itadingkenNdu.

⁴⁰IcedakenNdu perpadanenNdu man suruh-suruhenNdu, mahkotana iambekkenNdu ku bas kubang.

⁴¹Tembok-tembok kutana iruntuhkenNdu, benteng-bentengna enggo irontaskenNdu.

⁴²Kerina kalak si mentas arah e ngerampasisa, ia jadi uru-urun bangsa sekelewetna.

⁴³IberekenNdu kemenangen man musuhna, iberekenNdu keriahen man imbang-imbangna.

⁴⁴IbahanNdu la erguna senjata raja, ipelepasNdu ia talu erperang.

⁴⁵ItangtangiNdu kuasana selaku raja, ibenterkenNdu mahkotana ku taneh.

⁴⁶IbahanNdu maka pedas kal ia metua, ijurukenNdu ia.

⁴⁷ TUHAN, seh ndigan Kam cebuni? Ngayak ndigan rawaNdu gurlah bagi api?

⁴⁸Ingetlah uga gendekna geluh enda, ola min Kam lupa maka kami tinepaNdu si ermasap-masap.

⁴⁹Ise kin tetap nggeluh la mate-mate? Ise kin banci pulah i bas kuburen nari?

⁵⁰O Tuhan, i ja kekelengenNdu si nai? Si enggo ipadankenNdu man Daud i bas kesetianNdu.

⁵¹Inget min uga aku suruh-suruhenNdu igombangi kalak dingen ngaloken penghinan i bas bangsa-bangsa si deban nari.

⁵²O TUHAN, raja si ipilihNdu ihina imbangNdu, igombangina raja e ku japa pe ia lawes.

⁵³Pujilah TUHAN rasa lalap seh rasa lalap. Amin! Amin!