Read Batak Karo MASMUR 90 Bible Online

MASMUR 90 - Batak Karo bible

MASMUR 90

¹Pertoton Musa, suruh-suruhen Dibata. O TUHAN Kam kap ingan kami cicio, nai-nai nari ersundut-sundut.

²Ope denga ijadikenNdu deleng-deleng, ope denga ijadikenNdu doni enda Kam kap Dibata si rasa lalap.

³Kam si nuruhsa manusia mulih ku asalna, isalihkenNdu jadi abu taneh, asalna ndube.

⁴Seribu tahun seri nge iakapNdu ras sada wari, desken wari si nderbih si enggo lepas tah pe bagi pertukaren jaga malam saja. [107†]

⁵IombakkenNdu kami; kami desken nipi, desken dukut si ertunas;

⁶erpagi-pagi turah dingen terlak me ia, tapi kenca ben wari melus me.

⁷Sengget kami erkiteken rawaNdu, meripuk getem ibahan gara ateNdu.

⁸Dosa-dosa kami itamakenNdu i adep-adepenNdu, dosa-dosa kami si terbuni pe tangkas man baNdu.

⁹Gendek umur kami erkiteken rawaNdu, desken sekali erkumesah saja ngenca.

¹⁰Dekahna kami nggeluh lit pitu puluh tahun, adi kami megegeh banci jadi seh waluh puluh tahun. Tapi kesusahen e me ayam-ayam geluh kami, pedas-pedas keri umur si gendek e, jenari lesap me kami.

¹¹Ise metehsa uga sangatna rawaNdu? Ise metehsa uga jadina kune Kam merawa?

¹²Dage ajari kami ngertiken uga gendekna umur geluh kami, gelah kami jadi kalak pentar.

¹³O TUHAN, ndigan Kam ngadi merawa? Mekuah min ateNdu kemahanNdu.

¹⁴Useken min keleng ateNdu man kami tep-tep erpagi-pagi, gelah kami banci ermeriah ate dingen muji Kam kidekah umur geluh kami.

¹⁵Bereken min kami kemalemen ate seri dekahna ras tahun-tahun kiniseran si enggo inanami kami.

¹⁶Cidahken min perbahanenNdu man suruh-suruhenNdu, bere maka idah kesusuren kami kemulian kuasaNdu.

¹⁷O TUHAN Dibata, pasu-pasu min kami, gelah rulih kami i bas kasa kai si idahiken kami.