Read Batak Karo MASMUR 92 Bible Online

MASMUR 92 - Batak Karo bible

MASMUR 92

¹Ende-enden tupung wari Sabat.

²O TUHAN, seh riahna ngataken bujur man baNdu, janah rende muji Kam, o Dibata si Meganjangna;

³meritaken keleng ateNdu erpagi-pagi, dingen pertetapNdu tupung berngi,

⁴janah ngkuit gitar si sepuluh tinali, rikut ras gambus ras kulcapi.

⁵Sabap perbahanenNdu kap si pegedang ukurku, erkiteken perbahanenNdu, aku rende alu meriah.

⁶O TUHAN, seh kal belinna perbahanenNdu, andiko bagesna perukurenNdu.

⁷Kalak bodoh la ngasup ngantusisa, kalak longor la ngasup ngerti,

⁸ngkai maka kalak jahat turah mehumur desken dukut, kalak si ilat reh bayakna dingen sikap geluhna. Tapi nandangi meripuk me ia kerina,

⁹sabap Kam, o TUHAN, erkuasa seh rasa lalap.

¹⁰Ieteh kami maka kernep me kerina imbangNdu, kerina kalak jahat marpar-merap me.

¹¹IbahanNdu aku megegeh desken banteng, janah masu-masu aku alu simpar keriahen.

¹²Enggo kuidah imbangku italuken, sora serko kalak jahat kubegi pinger.

¹³Kalak bujur ertunas desken batang kurma, mehumur perturahna bagi batang cemara Libanon.

¹⁴Bali ia ras kayu si isuan i Rumah TUHAN, dingen turah i bas Rumah Dibatanta.

¹⁵Lalap ia meratah dingen paguh, aminna pe enggo metua, tetap erbuah.

¹⁶Encidahkenca maka bujur kap TUHAN, Ia kap pembelangku, la lit si la bujur i bas Ia.