Read Batak Karo MASMUR 98 Bible Online

MASMUR 98 - Batak Karo bible

MASMUR 98

¹Endekenlah ende-enden si mbaru man TUHAN, sabap perbahanenNa si mejin. Alu kuasa dingen gegehna si badia jine, Ia enggo menang.

²Iberitaken TUHAN kemenangenNa, enggo icidahkenNa keselamatenNa i lebe-lebe bangsa kerina.

³ItepatiNa padanNa man Israel bangsaNa, sabap Ia tetap erkeleng ate ras setia man kalak enda. Kerina bangsa-bangsa i doni, enggo ngidah kemenangen si reh i bas Dibatanta nari.

⁴Ersuraklah man TUHAN, o doni kerina, ersuraklah dingen rendelah perban riahna.

⁵Puji min TUHAN alu kulcapi, endekenlah ende-enden pujin man baNa.

⁶Embuslah tanduk ras terompet, ersuraklah man TUHAN rajanta.

⁷Ergeruhguhlah, o lawit ras kerina isiNa, o doni dingen kerina si ngianisa.

⁸O kam lau belin ertepuklah, o deleng-deleng rendelah ras-ras meriah iadepen TUHAN.

⁹Sabap Ia reh guna merentah doni enda. IrajaiNa kerina bangsa i doni enda alu bujur ras rembang tengah.