Read Batak Karo KUAN-KUANEN 1 Bible Online

KUAN-KUANEN 1 - Batak Karo bible

KUAN-KUANEN 1

¹Enda me pengajaren Salomo, anak Daud raja Israel. [1†]

²Tujunna e me nampati kalak gelah pentar dingen ngaloken pengajaren si mehuli, janah ngantusi ranan si mbages ertina.

³Iajarkenna kalak maka nggeluh pentar, bujur, adil dingen benar.

⁴Iajarkenna kalak si langa erpengalamen gelah cerdik, kalak si nguda gelah pantas dingen pentar.

⁵Pengajaren enda banci nambahi pemeteh kalak pentar, janah kalak si enggo meganjang sekolahna pe banci erlajar i jenari.

⁶Alu bage banci mbages isipatina erti si terbuni i bas pengajaren enda janah ietehna njabap persoalen-persoalen si ibereken kalak pentar.

⁷Guna ndatken pemeteh, si pemenana si la banci la lit i bas kalak e me mehamat dingen erkemalangen man TUHAN. Kalak lenge la nggit mperdiateken kepentaren dingen la ia nggit erlajar. [2†]

⁸O anakku, perdiatekenlah kai si ikataken nande bapandu man bandu,

⁹sabap ajarenna e nambahi lagu langkah si mehuli kap, si desken rudang-rudang i babo takalndu tah pe bura-bura i bas kerahungndu si erbahanca kam mejile.

¹⁰O anakku, adi iajuk-ajuk kalak jahat kam ola kam nggit.

¹¹Kune ikatakenna nina, “Ota si darami kalak maka si bunuh! Ota sipesenang dirinta alu nggempangi kalak si la ersalah.

¹²Tupung sijumpai ia nggeluh alu mejuah-juah, tapi tupung si tadingken ia enggo mate.

¹³Sirampuk barang-barangna si meherga gelah rumahta dem alu barang-barang rampasen.

¹⁴Ota ras kita, gelah si bagi-bagiken barang si itangko kita e.”

¹⁵O anakku ola kam nggit ngikutken kalak si bage. Sirangilah ia.

¹⁶La ia erkari-kari adi erbahan jahat. Katawari pe enggo sikap ia lako munuh.

¹⁷Perik-perik pe la nggit ndedeh siding adi idahna siding e itogeng.

¹⁸Tapi kalak jahat ikurukna kap lubang jadi siding man kesahna janah ia nge gedap ku bas.

¹⁹Perampuk, kesah kap asamna ngerampuk -- enda me si jadi man kalak si nggeluh ndarami untung melket.

²⁰Dengkehkenlah! Kepentaren erlebuh i gedang-gedang pasar bage pe i tiga. [3†]

²¹Megang sorana erlebuh i pintu-pintu gerbang dingen i bas ingan pulung jelma si nterem.

²²Nina, “O kalak motu! Asa kai nari atendu dekahna kam tetap motu? Asa kai nari dekahna meriah iakapndu i bas kebodohenndu janah la nggit erlajar?

²³Tinggelken adi kam kutembehi, gelah kam kuajarken alu mehuli jenari kubereken pemetehku man bandu.

²⁴Enggo kam kudilo dingen kuendik-endik tapi la ibegikenndu.

²⁵Kerina ajarku la diatendu pe, dingen la atendu ngena adi kam kupandang.

²⁶E maka tupung kam i bas kiniseran, tawa aku. Tupung kam i bas kebiaren kuguro-guroken kam.

²⁷Kutawa-tawai kam tupung kam iderpa galumbang kiniseran si reh desken angin kalinsungsung, seh maka kam suhsah janah mesui atendu.

²⁸I je maka ilebuhndu aku, tapi la kualoi, idaramindu aku tapi la kam jumpa ras aku.

²⁹La pernah turah ukurndu maka perlu kepe pemeteh. La kam nggit ngikutken TUHAN.

³⁰La pernah kam nggit ngaloken ajarku, janah la pernah iperdiatekenndu kune kupandang kam.

³¹Dage nanamindu me bekas perbahanenndu, janah mesui me atendu.

³²Kalak si la erpengalamen, mate erkiteken itulakna kepentaren.

³³Tapi kalak si megiken kepentaren, teneng geluhna janah la perlu ia mbiar.”