Read Batak Karo KUAN-KUANEN 12 Bible Online

KUAN-KUANEN 12 - Batak Karo bible

KUAN-KUANEN 12

¹Kalak si erngena ate man pemeteh mesikel ia ituriken kesalahenna, kalak lenge la ngena atena ipandang.

²Kalak bujur keleng ate TUHAN tapi si jahat sura-surana, nembeh ateNa.

³Kalak jahat labo lalap ia sikap, tapi kalak bujur tetap me ia paguh.

⁴Ndehara si mehuli, ia kap kemulian ras keriahen perbulangenna, tapi ndehara si njuruken bali kap ia ras penakit kangker.

⁵Kalak bujur, perbahanenna pe bujur man kalak, tapi kalak jahat, nipu kalak ngenca sura-surana.

⁶Ranan kalak jahat munuh me, tapi cakap kalak bujur ngkelini kap.

⁷Kalak jahat tombang me, janah masap me kesusurenna, tapi kesusuren kalak bujur tetap kap lit.

⁸Kalak si erpemeteh ipujiken me, tapi kalak motu iisakken pe.

⁹Madin ngemo ndatken nakan, asangken erlagak jadi si mbelin tapi la man.

¹⁰Kalak bujur, ikelengina kap biri-birina, tapi kalak jahat, isiksana asuh-asuhenna.

¹¹Perjuma si erbintuas, dem kap lumbungna, tapi motu kap kalak si muang wari-wari guna si sea-sea.

¹²Kalak jahat lalap jahat sura-surana, tapi kalak bujur desken tembok si paguh.

¹³Kalak jahat isidingi kata si ibelaskenna, tapi kalak bujur pulah i bas kiniseran nari.

¹⁴Manusia ndatken upah sue ras kai si ibelaskenna ras kai si ibahanna, idatsa me kai si patut ialokenna.

¹⁵Kalak lenge tetap benar iakapna bana, kalak pentar nggit megiken ajar.

¹⁶Kalak bodoh minter teridah menek atena, tapi kalak si lit ukurna la megelut kune ia ipandang.

¹⁷Alu melasken kata tuhu, kalak enggo encidahken keadilen, alu melasken kata guak, kalak enggo peturah si la adil.

¹⁸Ranan si la erpepah banci ngelukai ukur kalak desken pedang, tapi kepentaren desken tambar si pepalemken.

¹⁹Ranan la tuhu kentisik ngenca umurna, tapi kata tuhu tahan asa lalap.

²⁰Kalak si ersura-sura jahat, itipuna kap dirina jine, tapi kalak si mehuli sura-surana jumpa keriahen.

²¹Kalak bujur la jumpa cilaka, tapi kalak jahat lalap lit i bas kesusahen.

²²La ngena ate TUHAN man kalak perguak, tapi ngena ateNa man kalak si engkunduli cakapna.

²³Kalak si beluh rukur la encidah-cidahken kebeluhenna, tapi si lenge ermomo ia kerna kemotunna.

²⁴Kejingkaten erbahanca kalak ndatken kuasa, tapi kemalasen erbahanca kalak jadi suruh-suruhen.

²⁵Aru ate erbahanca keriahen lesap, tapi ranan mehuli erbahanca ate malem.

²⁶Kalak bujur jadi penegu-negu man temanna, tapi dalan kalak jahat mabai ia jadi papak.

²⁷Kalak malas la pernah seh sura-surana, tapi kalak si erdahin alu tutus ndatken untung si mbelin.

²⁸Kalak si erdalan i bas kinibujuren, nggeluh me, si ngikutken dalan kejahaten, kematen me perayakenna.