Read Batak Karo KUAN-KUANEN 13 Bible Online

KUAN-KUANEN 13 - Batak Karo bible

KUAN-KUANEN 13

¹Anak si pentar ipergermetkenna adi bapana mereken ajar, tapi kalak si meganjang rukur la nggit ngaku salah.

²Kalak bujur ndat upah i bas kai si ikatakenna, kalak si la bujur nembeh atena si mehuli.

³Si njagai pengeranana terkawal me; si pet ngerana la erpepah encedaken dirina jine.

⁴Kalak malas melala sura-surana tapi sada pe labo seh, si erdahin erbintuas sura-surana seh kerina.

⁵Kalak bujur ciga atena kata guak, tapi kata-kata kalak jahat njuruken dingen erbahan iakapna mela.

⁶Kinibujuren ngkawali kalak bujur, kejahaten mahanca kalak perdosa guling.

⁷Lit kalak pekulah-kulahna ia bayak, tapi situhuna kadena pe labo lit, lit kalak si pekulah-kulahna ia musil, tapi bayak kal kepe ia.

⁸Kalak bayak nggalar lako engkawali kesahna, tapi kalak musil la lit ise pe si ngancamsa.

⁹Kalak bujur desken sinalsal si harhar, kalak jahat bali kap ras lampu si milep-ilep.

¹⁰Adi meganjang rukur erbahanca susah nge, e maka madin nge mindo pengajaren.

¹¹Adi melukah iakap ndatken kebayaken, melukah kang lesap, tapi ertambah-tambah kap erta si ipepulung alu susah dingen mesera.

¹²Kune pengarapen enggo bene, pusuh pe getem, tapi adi seh lah sura-sura, ukur pe meriah.

¹³Kalak si la nggit ngaloken pedah ikenai kesusahen me ia, tapi kalak si ngikutken ajar dat upah kap.

¹⁴Pengajaren kalak pentar desken sumbul kegeluhen kap, ia si nampati kam gelah pulah i bas kiniseran nari.

¹⁵Kalak si lit ukurna terpuji me, tapi si la terteki meneken bana me.

¹⁶Adi iukuri lebe maka ibelas e pentar kap, kalak lenge imomokenna kebodohenna.

¹⁷Persuruhen si jahat ukurna peturah perubaten, persuruhen si terteki mereken kedamen.

¹⁸Musil ras uru-uru sikerajangen kalak si la megiken ajar, kalak si nggit iajarken ndatken kehamaten.

¹⁹Andiko ulina adi seh sura-sura, kalak bodoh labo nggit nundalken kejahaten.

²⁰Adi kam erteman ras kalak pentar kam pe ikut jadi pentar, tapi adi kalak bodoh temanindu, kam pe ikut jadi bodoh.

²¹Si perdosa gelgel ielis-elis kiniseran, tapi kalak bujur kiniulin kap upahna.

²²Kalak bujur itadingkenna kebayakenna man anak kempuna, tapi kebayaken kalak jahat kempak kalak bujur perlawesna.

²³Juma si itadingken banci mereken asil guna nakan man si musil-musil, tapi kalak si la bujur ipelepasna jine e terulang.

²⁴Si la ngeligas anakna la kap atena keleng anakna, adi keleng atendu, ola kam alang-alangen ngukumsa.

²⁵Kalak bujur gelgel bias nakanna, tapi kalak jahat lalap kekurangen.