Read Batak Karo KUAN-KUANEN 15 Bible Online

KUAN-KUANEN 15 - Batak Karo bible

KUAN-KUANEN 15

¹Alu jabap si melias mantak rawa si gara, tapi jabap si merampus pekeke ate merawa.

²Ranan kalak pentar dem alu pemeteh, tapi ranan kalak bodoh la lit ertina.

³Kai pe si jadi idah TUHAN i japa pe, iperdiatekenNa kerina perbahanen si jahat ntah pe si mehuli.

⁴Ranan mehuli mereken kegeluhen, cakap si ngelukai pusuh erbahanca bene ukur.

⁵Kalak bodoh la iperdiatekenna ajar bapana, kalak pentar ilakokenna ajar orang tuana.

⁶Kebayaken kalak bujur tetap lit, tapi kebayaken kalak jahat bene i bas paksa kiniseran.

⁷Kepentaren icecarken kalak pentar, labo kalak motu si encecarkenca.

⁸Meriah ukur TUHAN megiken pertoton kalak bujur, tapi ciga ateNa persembahen kalak jahat.

⁹Nembeh ate TUHAN dalan kalak jahat, tapi ikelengiNa si ngelakoken kebujuren.

¹⁰Kalak si ndalanken salah, iukum me alu mesangat, kalak si la nggit ipandang, mate me.

¹¹Doni kematen pe talang ibahan TUHAN, e maka perukuren manusia pe labo terbuniken i adep-adepen TUHAN.

¹²Kalak si meganjang rukur la atena ngena ipandang, la pernah ia nggit mindo pertenget i bas kalak si pentar nari.

¹³Tupung meriah iakap kalak, cirem ia, tapi tupung susah, berjut ayona.

¹⁴Kalak si beluh rukur merincuh ia erlajar, tapi kalak bodoh puas iakapna amin pe ia lenge.

¹⁵Kalak musil geluhna dem alu perbeben, tapi kalak si meriah ukurna, senang iakapna nggeluh.

¹⁶Madin musil tapi malang man TUHAN, asangken bayak tapi dem aru ate.

¹⁷Madin man gulen saja ras si ikelengindu, asangken man daging si entabeh tapi ras kalak si nembeh atendu.

¹⁸Kalak si perampang, peturah perjengilen kap, tapi kalak sabar maba dame.

¹⁹Kalak malas i japa pe jumpa kesusahen; tapi kalak bujur la jumpa kiniseran.

²⁰Anak si pentar, malem ate bapana ibahanna; tapi anak si lenge la iergakenna nandena.

²¹Kalak lenge meriah iakapna i bas kebodohenna, kalak pentar ilakokenna kai si benar.

²²Adi melala kam dat pertenget seh me bagi si isurandu, adi la lit pertenget labo seh sura-sura.

²³Seh kal riahna ukur adi terbelasken, kata si payo i bas paksa si payo.

²⁴Kalak pentar nangkeng ia arah dalan ku kegeluhen, labo ngincuah arah dalan si perlawesna kempak kematen.

²⁵Ikernepken TUHAN me rumah kalak si meganjang rukur, tapi ikawalina sikerajangen diberu balu-balu.

²⁶Nembeh ate TUHAN kempak sura-sura kalak perdosa, tapi ranan mehuli ngena ateNa.

²⁷Kalak si ndarami untung alu dalan si la bujur, isarenkenna kap keluargana kempak kesusahen, si la nggit ngaloken uang sogok reh gedangna me umurna.

²⁸Kalak si mehuli, iukurina lebe maka ibelaskenna jabapna, kalak jahat pedas ijabapna, tapi ipeturahna kesusahen.

²⁹Adi kalak mehuli ertoto, ibegiken TUHAN pertotonna, tapi la diateNa pe kalak jahat.

³⁰Ngidah ayo si siang meriah kal ukurna, megi berita si mehuli reh senangna ka iakapna.

³¹Kalak si nggit megiken ajar pentar kap.

³²Kalak si la nggit megiken ajar, bana pe la iergakenna, kalak si nggit ipandang, reh pentarna kap ia.

³³Erkemalangen man TUHAN e kap palas persekolahen, ukur si meteruk e kap palas ndatken kehamaten.