Read Batak Karo KUAN-KUANEN 18 Bible Online

KUAN-KUANEN 18 - Batak Karo bible

KUAN-KUANEN 18

¹Kalak si la nggit erteman, bana ngenca atena ngena, si iakap kalak la jore, iakapna payo.

²Kalak bodoh la terbereken pengertin man bana; encidahken kebeluhenna ngenca atena.

³Dosa ras kemelan sada kap pengodakna; adi bene kemulian, mela datndu jadi gancihna.

⁴Ranan kalak banci jadi ulu kepentaren si mbages desken lawit, maler bagi lau belin si malem.

⁵La mehuli engkapiti kalak jahat, dingen la mereken keadilen man kalak si la ersalah.

⁶Kune kalak bodoh mulai erjengil, mindo perligas kap ia ngenca.

⁷Ranan kalak bodoh encedaken bana, cakapna jadi siding man dirina.

⁸Ranan percekurak entebu nanamna, merincuh kalak nelenca.

⁹Kalak malas seri jahatna ras kalak si nggit encedai.

¹⁰ TUHAN e bali ras benteng si paguh, ku je me perlawes kalak bujur gelah ia terkelin.

¹¹Isangka kalak bayak maka ertana me jadi bentengna, bali ras tembok si meganjang janah paguh i kelewet kuta.

¹²Kalak megombang la banci lang terantuk, si meteruk rukur ndatken kehamaten me.

¹³Dengkehken lebe ope denga njabap, adi la bage ibahanndu, bodoh dingen ihinandu kalak.

¹⁴Alu kerincuhen nggeluh, kalak sakit reh gegehna; kune bene kerincuhen e, bene ka pe pengarapenna.

¹⁵Kalak si lit pemetehna, lalap ia merincuh pemeteh, kalak pentar gelgel atena erlajar.

¹⁶Bereken pemere man kalak si erkuasa, gelah la mesera jumpa ras ia.

¹⁷Ranan kalak si mula-mula ngerana i bas sidang pengadilen, seh maka imbangna mereken penungkunen bana.

¹⁸Adi dua kalak perimbang i pengadilen, perkarana banci iputusken alu erbahan tikam tanduk.

¹⁹Sampatilah seninandu maka ia desken benteng si nteguh man bandu; adi rubat kam ras ia, la ia nggit nalangi pintunna man bandu.

²⁰Ranan si ibelasken, inanami nge nanamna.

²¹Kai si ibelaskenndu banci ngkelini ntah encedaken geluhndu, e maka alokenlah akibat kerina pengeranandu.

²²Kalak si enggo ndat ndehara, ndatken kesangapen, e tandana maka ia ikelengi TUHAN.

²³Kalak musil mindo alu mesek-sek, tapi kalak bayak mersik penjabapna.

²⁴Lit teman si la setia, lit ka teman meriah deheren asangken ersenina.