Read Batak Karo KUAN-KUANEN 21 Bible Online

KUAN-KUANEN 21 - Batak Karo bible

KUAN-KUANEN 21

¹ TUHAN si ngaturken perukuren raja, e maka ratur bagi raturna perpaler lau maler.

²Iakapndu payo kerina perbahanenndu, tapi ingetlah, maka TUHAN nimbang perukurenndu.

³Bahanlah kai si adil dingen benar, senangen iakap TUHAN e asangken maba persembahen man baNa.

⁴Kalak jahat e perdosa, sabap ia ikuasai ukur meganjang dingen megombang.

⁵Rencana si megermet maba keuntungen, perbahanen si merudu-rudu mereken kerugin.

⁶Kebayaken si ialoken alu la bujur, meter bene janah ibabaina kalak ku kubur.

⁷Kalak jahat tersiksa erkiteken kekejamenna jine, perbahan itulakna ngelakoken perbahanen si bujur.

⁸Kalak ersalah dalanna reluk-eluk, kalak bujur ilakokenna kai si bujur.

⁹Ulin ringan i bas suki tarum rumah, asangken sada rumah ras ndehara si pet erjengil.

¹⁰Kalak jahat merincuh lalap erbahan si jahat, nandangi ise pe labo atena mekuah.

¹¹Adi kalak megombang iukum, kalak si langa erpengalamen ndatken pengalamen. Adi kalak pentar iajarken, datca pemeteh.

¹²Dibata kap ngenca bujur, ietehNa kai si jadi i bas rumah kalak jahat. Ia kap si nombangken kalak jahat maka kernep.

¹³Ise la nggit ndengkehken penderkuh kalak musil, ia pe la ibegiken tupung ia jine mindo penampat.

¹⁴Guna pesinik rawa ras tembeh kalak, berekenlah pemere alu sinik-sinik.

¹⁵Meriah ukur kalak bujur, adi keadilen idalanken; tapi kalak jahat erndele ate.

¹⁶Kalak si la nggit ngikuti kegeluhen si mehuli, tentu ia ngadi i bas kematen.

¹⁷Kalak si meriah-meriah ngenca atena, tetap ia i bas kekurangen; kalak si pesta-pesta akapna nggerak, labo banci jadi bayak.

¹⁸Kalak jahat erbahan rencana gelah mesui ate kalak bujur, tapi kalak jahat e nge dungna cilaka.

¹⁹Madin tading i gurun pasir, asangken tading ras ndehara si perjengil ras perdegil.

²⁰Kalak pentar tetap bayak dingen nggeluh i bas kemewahen tapi kalak bodoh ikerikenna duit si mbaru ialoken.

²¹Adi kam kalak mehuli dingen bujur, gedang me umurndu. Mehamat kalak man bandu, ibahanna si adil man bandu.

²²Panglima si cerdik ngasup ngerebut kuta si ijaga kalak si mbisa, dingen ngeruntuhken benteng-benteng penalemenna.

²³Adi atendu isilahi kiniseran, manjar-anjar melasken kata.

²⁴Kalak si megombang dingen meganjang rukur, nggit mandangi dingen jago akapna bana.

²⁵Kalak malas mekisat erdahin, e me sabapna mesui atena lalap.

²⁶Gedang-gedang wari si iukurkenna, kerina si merincuh ia ndatkenca. Tapi kalak bujur nggit mere alu melumbar.

²⁷La ngena ate TUHAN adi kalak jahat mpersembahken persembahen, terlebih adi persembahen e ipersembahken alu ukur jahat.

²⁸Kasa kai si perguak la terteki, tapi ranan kalak si meteh perkara e banci ialoken.

²⁹Kalak bujur lit kepercayan dirina, kalak jahat terpaksa pekulah-kulah.

³⁰Adi TUHAN si ngelawan kam, la lit si banci nampati kam, sia-sia kap kebeluhen, kecerdiken dingen kepentarenndu.

³¹Aminna ertempur alu perlengkapen kuda perang, tapi TUHAN kap si netapken ise menang.