Read Batak Karo KUAN-KUANEN 22 Bible Online

KUAN-KUANEN 22 - Batak Karo bible

KUAN-KUANEN 22

¹Gelar mehuli ergan kap, asangken erta-erta, kekelengen kalak ergan asangken pirak ras emas.

²Kalak bayak ras kalak mesera lit perserina, TUHAN kap si nepasa kerina.

³Kalak pantas idahna kiniseran, nilah ia, tapi kalak si la rukur iteruskenna e maka mesui atena.

⁴Kalak si erkemalangen man TUHAN, meteruk rukur, e maka datca kebayaken, kemulian dingen kegeluhen.

⁵Siding ras ragum, lit i bas dalan kalak jahat, sirangilah e kerina adi atendu selamat.

⁶Ajarkenlah man anak uga kearusen nggeluh, maka ikutkenna asa umurna nggeluh.

⁷Kalak musil jadi suruh-suruhen kalak bayak, si ngeraih jadi budak kalak si peraihken.

⁸Kalak si ngajarken si la bujur buahna kiniseran, dungna kuasana pe bene.

⁹Kalak bujur ipasu-pasu TUHAN, perban ibagikenna rejekina man kalak si kekurangen.

¹⁰Pelawes kalak si penghina, gelah ngadi perjengilen, perubaten, ras si panjang-punjuten.

¹¹Kalak si ngena atena kebujuren dingen mehuli pengeranana, ia me kap teman raja.

¹²Pemeteh si benar idah TUHAN kap, ilesapkenna ranan kalak si la bujur.

¹³Kalak malas ngada-ngada saja i rumah, nina: adi ndarat ia banci ia irigep singa i tengah dalan.

¹⁴Cakap penaki-naki diberu perlua-lua desken siding kap, nggulingken kalak si kena pernembeh TUHAN.

¹⁵Biasa kap adi anak ngelakoken perbahanen si la payo, tapi perligas banci ngobah langkahna si la payo.

¹⁶Kalak si ndedeh kalak si musil-musil, tujunna e me gelah bayak, jenari iberekenna pemere man kalak bayak, tapi kedungenna ia nge si musilna.

¹⁷Dengkehkenlah, maka kuajarken man bandu perkatan kalak pentar. Perdiatekenlah,

¹⁸gelah meriah ukurndu kune banci ingetndu dingen banci melaskenca saja pe.

¹⁹Sura-surangku gelah kam tek man TUHAN, e me sabapna maka genduari ateku pebetehken ajaren-ajaren enda man bandu.

²⁰Telu puluh pertenget enggo kusuratken man bandu, pertenget si isina kepentaren dingen ajar si mehuli,

²¹janah ngajarken man bandu kai si benar. Dage, adi kam isuruh pelajarisa, ietehndu me uga njabap alu payo.

²²Ola rugiken kalak musil, erkiteken kam ngasup engkuasai ia; dingen i bas sidang pengadilen ola rugiken kalak si la meherga.

²³TUHAN kap si mbela perkarana, janah ngancam kesah kalak si ngancam ia.

²⁴Ola pertemani kalak si pedas naik darehna.

²⁵Iusihndu denggo ia, jenari lanai kam ngasup meneken kebiasan si bage rupana.

²⁶Ola erpadan nggalari utang kalak si deban.

²⁷Kune la kam ngasup nggalarisa, ingan medemndu pe ilelangna.

²⁸Ola kal cuba-cubakendu miser baleng si enggo itetapken nini-ninindu.

²⁹Pernah kin idahndu kalak pantas ndahiken dahinna? I bas istana raja-raja kap ia isuruh erdahin, labo i bas rumah kalak biasa.