Read Batak Karo KUAN-KUANEN 23 Bible Online

KUAN-KUANEN 23 - Batak Karo bible

KUAN-KUANEN 23

¹Kune kam kundul man ras si biak raja, ingetlah ise ia.

²Adi kam merincuh kal manca, angkarlah.

³Ola sangkar man nakan si iberekenna man bandu, nggit mawen ijeratna atena kam.

⁴Ola suhsahi dirindu ndarami kebayaken,

⁵sabap i bas sengkemirep saja banci mayap ertandu, tempa lit kabengna jenari kabang ia ku awang-awang desken rajawali.

⁶Ola kam nggit man ras kalak mediker. Ola kam merincuh man pangan entabeh si isikapkenna.

⁷Sabap bagenda me nina kari man bandu, “Mari man; tambahi nakanndu,” kepeken labo bage sura-surana. Lain kata pedempak lain kata petundal.

⁸Iutahkenndu me dungna kai si enggo ipanndu, cakapndu mehuli bana pe lanai lit gunana.

⁹Ola cubaken ngajarken kalak bodoh; la terergaisa ajarndu e.

¹⁰Ndigan pe ola cubakenndu miser baleng ntah pe muat sikerajangen anak melumang.

¹¹Sabap TUHAN kap pembela si erkuasa; Ia kap nampati anak-anak melumang e ngelawan kam.

¹²Perdiatekenlah ajar gurundu jenari erlajarlah pekeri gegeh.

¹³Ola kam biar-biaren ndidik anakndu, adi ipekpekndu ia labo ia mate,

¹⁴tapi selamat.

¹⁵O anakku, meriah kal ukurku adi pentar kam.

¹⁶Ersurak pusuhku megiken kam melasken ranan si dem pemeteh.

¹⁷Ola morahi kalak perdosa. Erkemalangenlah man TUHAN,

¹⁸gelah terang wari-warindu si pepagi, dingen pengarapenndu pe la bene.

¹⁹Dengkehkenlah o anakku! Jadilah pentar. Megermetlah nandangi perdalanen geluhndu.

²⁰Ola pertemani kalak pemabuk dingen kalak merangap,

²¹sabap jadi kalak musil me ia. Adi medem saja pendahinndu nandangi lanai bo kam ergonje.

²²Begikenlah ranan bapandu; sabap adi la erkiteken ia labo kam lit. Kune nandendu enggo metua, cidahkenlah maka meherga iakapndu ia.

²³Kebenaren, kepentaren, pengajaren, dingen pengertin kerina perlu itukur, tapi ola kal dayaken.

²⁴Malem ate bapa adi anakna erkemalangen man Dibata; ersurak pusuhna adi pentar anakna.

²⁵Bahanlah maka megah iakap nande bapandu; malemlah ate diberu si mupusken kam.

²⁶O anakku, megermetlah dingen usihlah aku!

²⁷Diberu perdenggal si pencarinna erlua-lua siding si bahaya kap.

²⁸Ia desken perampuk si nggempangi, jenari ibabaina nterem dilaki erlua-lua.

²⁹ [29-30] Ietehndu kang kai si banci jadi nandangi kalak peminem anggur adi melalasa ia minem inemen keras? Mesui naring atena dingen mesera iakapna. Rusur ia erjengil dingen kelsehen. Matana megara, badanna luka-luka, kepeken kerina si e banci isilahkenna.

³¹Ola pelepas dirindu igoda anggur aminna pe rupana teridah erndilap maler ku bas gelas, entabeh man tatapen.

³²Pepagina erpagi-pagi igejapndu tempa kam enggo itagut nipe si erbisa.

³³Gelap pengenen matandu, rukur lanai kam ngasup, ngam-ngamen babahndu.

³⁴Iakapndu bandu bali ras sanga i datas ancuk-ancuk kapal i lawit; melimber takalndu, mbewat-mbewat perdalanndu.

³⁵E maka ngerana me kam, “Ugapa pe enggo aku igudam kalak janah iparapi kalak, tapi lanai kuinget kai si enggo jadi. Engkai maka madat kal matangku? Minem denga ateku!”