Read Batak Karo KUAN-KUANEN 24 Bible Online

KUAN-KUANEN 24 - Batak Karo bible

KUAN-KUANEN 24

¹Ola menggaindu kalak jahat, ola kal pertemani ia.

²Uga erbahan kalak cilaka e nge si iukurkenna janah babahna melasken kerina si la tengka saja ngenca.

³Jabu ipanteki erpalasken kepentaren ras pengertin.

⁴I ja lit pemeteh, i je lit bilik-bilik kuh ras barang-barang si meherga ras mehuli.

⁵Kalak pentar lebihen asangken kalak megegeh. Pentingen kap pemeteh asangken gegeh.

⁶Ma si bahan kin lebe rencana si megermet, ope denga kita lawes ku bas peperangen? Reh buena kalak si mereken pedah, reh belinna kemungkinen menang.

⁷Kepentaren meganjangsa guna ierti kalak longor. La lit belas-belas kalak bodoh tupung kalak melasken perkara-perkara si penting.

⁸Kalak si rusur ngerencanaken kejahaten ikataken kalak me ia tukang recok.

⁹Kerina perukuren kalak bodoh dosa kap. Kalak si rusur naling-naling kalak si deban, ise pe labo meriah rassa.

¹⁰Kalak si mintes bene ukurna tupung paksa gawat, kalak si bage tuhu-tuhu lemah kal.

¹¹Ola biar-biaren mulahi kalak si nandangi ibunuh. Pulahilah kalak si nandangi itegu ku bas penggelehen.

¹²Banci jadi nindu, “Labo e urusenku.” Tapi Dibata kap si meteh dingen si ngadili palas perukurenndu. Ia kap si ngawasi kegeluhenndu dingen si erbalas man bandu rikutken perbahanenndu.

¹³O anakku panlah tengguli sabap mehuli kap e. Bali ras tengguli wani entebu man pangan,

¹⁴bage pe kepentaren perlu kal man pertendinndu. Adi pentar kam terang me wari-warindu si pepagi.

¹⁵Ola bali ras kalak jahat si erpekat ngerampuk kalak bujur dingen ngerampas rumahna.

¹⁶Sabap aminna pe kalak bujur piga-piga kali guling tapi terus ia keke ka mulihi. Tapi kalak jahat kernep me ia erkiteken kena cilaka.

¹⁷Ola megah akapndu kune musuhndu kena cilaka, ola kam ersurak adi guling ia.

¹⁸Sabap la banci lang idah TUHAN kap perbahanenndu e jenari nembeh ateNa ngenehen kam, e maka lanai iukumna imbangndu ndai.

¹⁹Ola kam rate segat ntah cian man kalak jahat.

²⁰Kalak jahat gelap kap warina si pepagi, janah la lit pengarapenna.

²¹O anakku, erkemalangenlah man TUHAN janah mehamatlah man raja. Ola ikut-ikutndu kalak ngelawan ia.

²²Kalak si bage banci kap kernep i bas sengkemirep, sabap labo perkara kitik kune Dibata ntah raja mereken cilaka.

²³Kalak pentar pernah ngerana bagenda: Hakim la banci la rembang tengah.

²⁴Adi kalak si ersalah ikapitina, maka isumpahi me hakim e jenari kerina kalak rate nembeh man bana.

²⁵Tapi Hakim si mereken ukumen man kalak si ersalah dat pasu-pasu me ia janah ihamati pe.

²⁶Jabapen si bujur e kap encidahken teman si tuhu-tuhu.

²⁷Ola erjabu, ope denga lit jamin ras pencarinndu.

²⁸Ola kam jadi saksi nandangi kalak si deban, alu la lit alasen si patut; ngataken si la tuhu kerna ia.

²⁹Ola nindu, “Kubahan man bana sue ras perbahanenna man bangku! Kubalas ateku perbahanenna.”

³⁰Erdalan aku arah juma peken anggur kalak perkisat, kalak si bodoh.

³¹Enggo terulang kal janah mbages kal dukutna. Bide batuna enggo runtuh.

³²Kenca kuperdiateken, rukur aku kerna si e, jenari kubuat pelajaren kerna si e.

³³Banci kam munduk-unduk, banci kam medem. Cirempu kam janahndu ngada-ngada [19†]

³⁴tapi tarunndu munduk-unduk, reh me kemusilen ngelawan kam desken perampok si ersenjata.