Read Batak Karo KUAN-KUANEN 27 Bible Online

KUAN-KUANEN 27 - Batak Karo bible

KUAN-KUANEN 27

¹Ola meganjang sura-surandu kerna wari si pepagi sabap la ieteh kai si jadi kelang-kelangna e. [23†]

²Ola akapndu meganjang bandu jenari ipujindu dirindu, kalak si debanlah si muji kam aminna pe la itandaindu.

³Batu ras kersik la mberat, adi ibandingken ras kiniseran si jadi erkiteken kebodohen.

⁴Pernembeh e mehantu janah encedaken kap, tapi ise tahan ngalaken cimberu?

⁵Ulin mandang alu terang-terangen, asangken iakap kalak la diatendu ia.

⁶Adi teman mehuli kap ukurna aminna pe ipekpekna kita, tapi elem-elem ate imbang, aminna pe iemana kita.

⁷Tupung kam besur, tengguli pe la atendu bage, tapi adi melihe, si pagit e pe entabeh nanamna.

⁸Kalak si nadingken rumahna, bali kap ras perik nadingken asarna.

⁹Minak wangi ras si merim-merim erbahanca ate meriah, kiniseran erbahanca getem pusuh.

¹⁰Ola lupakenndu temandu bage pe teman bapandu, i bas kiniseran ola pindo penampat seninandu. Belinen gunana teman si sebalengen, asangken senina si ndauh i bas kita nari.

¹¹O anakku jadilah pentar dingen bahanlah meriah ateku, gelah lit jabapku nandangi kalak si mandang aku.

¹²Kalak pentar nilah ia kune lit bahaya, kalak si la rukur ipinterkenna dalinna e maka jumpa ia kiniseran.

¹³Kalak si nggit njamini utang kalak si la itandaina, banci ibuat ertana jadi jaminen si ijaminina e.

¹⁴Kalak si ngataken mejuah-juah man temanna alu sora megang erpagi-pagi, desken numpahi nge ia.

¹⁵Ndehara si lalap atena erjengil, bali kap ia ras tarum cires paksa perudan.

¹⁶Ndehara si bage la nggit sinik, bali ras angin la terpejeneng, dingen minak la terjemak.

¹⁷Desken waja petelap waja, bage pe manusia erlajar sapih-sapih ia.

¹⁸Kalak si pekena-kena batang ara, ipanna me buahna, ihamati me pelayan si ngelai tuanna.

¹⁹Siidahndu i bas lau, e me awih rupandu. Siidahndu i bas pusuhndu, e me jine dirindu.

²⁰I bas doni kalak mate mbelang kap ingan, bage pe sura-sura manusia lalap la ersibar.

²¹Emas ras pirak iane i bas api; sekalak manusia itandai i bas carana ngaloken pujin.

²²Aminna pe kalak bodoh mekelek ipekpek, lalap nge la bene kebodohenna.

²³Piaralah asuh-asuhenndu alu mehuli;

²⁴sabap kebayaken labo gelgel, sedangken bangsa pe labo tahan rasa lalap.

²⁵Man asuh-asuhen e, isabi janah ipepulung me dukut-dukut i mbalmbal ras i deleng-deleng, kenca bage turah ka dukut si mbaru.

²⁶I bas mbulu biri-biri nari datndu paken, dingen alu duit ulih pendayan kambingndu banci itukurndu taneh si mbaru.

²⁷I bas kambing si tading nari datndu susu guna dirindu ras keluargandu bage pe asuh-asuhenndu si deban.