Read Batak Karo KUAN-KUANEN 28 Bible Online

KUAN-KUANEN 28 - Batak Karo bible

KUAN-KUANEN 28

¹Kiam kalak jahat aminna la pe lit si ngelissa tapi kalak bujur mbisa bali ras singa.

²Bangsa si perdosa, sambar-sambar si ngerajaisa, tapi bangsa si irajai kalak si beluh rukur tetap me percibalna.

³Kalak erkuasa si nindih kalak musil, bali kap ia ras udan encedaken peranin.

⁴Kalak si mpersilahangken undang-undang, ikapitina kap si jahat, kalak si patuh man undang-undang ilawanna kap si jahat.

⁵Kalak jahat la iertina kai si bujur, tapi kalak si nembah TUHAN, iangkana kerina.

⁶Madin jadi kalak mesera tapi pinter ukurna, asangken bayak tapi reluk-eluk ukurna.

⁷Pentar kap anak perana si patuh man undang-undang, tapi kalak si erteman ras kalak rangap njuruken bapana kap.

⁸Kalak si ndatken kebayaken alu pebungaken duit, dingen muat untung alu la ersisi, la banci lang ndabuh me kebayakenna e kempak kalak si erkuah ate man si musil-musil.

⁹Adi la ikutkenndu undang-undang Dibata, megiken pertotondu pe mutah ateNa.

¹⁰Kalak si ngajuk kalak bujur ngelakoken si jahat, ia jine nge ndabuh ku bas lubang si ikurukna. Kalak si bujur ukurna ia me dat kemalemen ate.

¹¹Kalak bayak beluh iakapna bana, tapi kalak musil si pentar itandaina nge bana.

¹²Adi kalak bujur erkuasa, lit keriahen mekelek, tapi adi kalak jahat merentah, sinik kalak kerina.

¹³Kalak si muniken dosana la banci sangap, kalak si ngakuken dingen nadingken dosana, ialemi Dibata kap.

¹⁴Erkemalangenlah man TUHAN katawari pe, maka kam sangap. Adi mersik ukurndu, bene me kam.

¹⁵Kalak jahat si engkuasai kalak si musil-musil, bali kap ia ras singa si erdengum dingen beruang si kelihen.

¹⁶Sekalak raja si la rukur, kejam kap perbahanenna, tapi ernembeh ate man si la bujur, ndekah kap ia jadi raja.

¹⁷Sekalak si pernah munuh pedas-pedas ikurukna lubang kuburna, ola pada ia iambati.

¹⁸Adi kam bujur, malem atendu. Adi la kam bujur, rempet kam guling.

¹⁹Perjuma si erbintuas bias kap nakanna, kalak si la make wari-wari, musil me ia.

²⁰Kalak bujur malem atena nggeluh, tapi kalak si meter atena bayak, la ia banci pulah i bas ukumen nari.

²¹Rayo-ayo la kap mehuli; tapi lit kang kalak ngkapiti si salah erkiteken sepenggel roti.

²²Kalak merangap pedas atena bayak, la ietehna lanai ndekah reh kemusilen nindih ia.

²³Kalak si ngajari temanna, ia iergai lebih asangken si muji-mujisa.

²⁴Kalak si erpengakap maka labo erdosa nangko barang orang tua, bali kap ia ras pinangko.

²⁵Si ngukuri dirina jine ngelegi kiniseran saja ngenca, untungen adi kam tek man TUHAN.

²⁶Kalak si ernalem man perukuren saja, longor kap, si ngikutken ajar kepentaren, terkelin me.

²⁷Kalak si nggit mere man kalak musil la banci kurang i bas ia, kalak si ipitpitkenna matana nandangi keperlun kalak musil, isumpahi me.

²⁸Adi kalak jahat si erkuasa, cebuni kalak kerina. Adi kernep kalak jahat kerina, kalak bujur ka mulihken jadi raja.