Read Batak Karo KUAN-KUANEN 29 Bible Online

KUAN-KUANEN 29 - Batak Karo bible

KUAN-KUANEN 29

¹Kalak si mekeng, aminna pe usur gia ipandang, i bas sada paksa la banci lang getem, lanai terpekena mulihi.

²Adi kalak benar merentah, meriah ukur jelma si nterem. Tapi adi kalak jahat si erkuasa, mesui ate kalak kerina.

³Kalak si keleng atena kepentaren, megah iakap bapana, kalak si nemani diberu si pencarinna erlua-lua, mbuang-mbuang kinilitenna kap.

⁴Adi iperdiateken rajalah kebujuren, la banci lang paguh me negerina tapi adi duit ngenca atena, icedakenna me negerina.

⁵Kalak si muji-muji temanna, itogengna kap siding man bana jine.

⁶Kalak jahat kena siding dosana, kalak bujur, malem dingen salang sai iakapna.

⁷Kalak si mehuli iantusina kebujuren kalak musil, tapi kalak jahat la iantusina e kerina.

⁸Si penguru-nguru guntar ibahanna kuta, tapi kalak si beluh rukur njadiken ketenengen.

⁹Adi erpekara kalak si lit pengertinna ras kalak bodoh, kalak bodoh e ngisak-ngisak janah tawa-tawa kap.

¹⁰Pemunuh nembeh atena kempak kalak si pinter ukurna, tapi kalak bujur ngkawalisa.

¹¹Adi kalak lenge nembeh icidahkenna kal ukurna, tapi kalak si beluh rukur saber dingen terampersa bana.

¹²Adi megermet si erkuasa mperdiateken cakap la tuhu, kerina kap pegawaina guak.

¹³Kalak musil ras si nindihsa lit perserina duana ibereken TUHAN mata.

¹⁴Adi ikapiti raja kalak bujur, la banci lang ndekah ia jadi raja.

¹⁵Pedah dingen ajar, mehuli kap man anak-anak, anak si lalap itami-tami, ijurukenna me nandena.

¹⁶Adi kalak jahat merentah, tambah-tambah me kejahaten, tapi idah kalak bujur me uga pergulingna kalak jahat.

¹⁷Berekenlah ajar man anakndu, maka megah dingen malem atendu ibahanna.

¹⁸Bangsa si la ngikutken perentah TUHAN, e me bangsa si rontang. Sangap me kalak si patuh man undang-undang TUHAN.

¹⁹La kam banci ngajarken suruh-suruhen alu ngerana saja. Iertina tapi la diatena.

²⁰Lalan pengarapen i bas kalak si medungu, asangken man kalak si pet ngerana tapi la rukur.

²¹Suruh-suruhen si itami-tami kitik-kitikna nari, dungna lanai terkuasai.

²²Kalak si murah merampus, erbahanca nterem kalak susah dingen erjengil.

²³Kalak megombang la banci la guling, kalak si meteruk rukur ihamati.

²⁴Kalak si nampati pinangko, ndarami cilaka guna dirina jine. Adi terus terang ia i pengadilen, iukum me ia. Tapi adi lang, Dibata me si numpahi ia.

²⁵Mbiar man perukuren kalak, erbahan susah saja. Tek man TUHAN erbahanca kalak teneng.

²⁶Nterem kalak nggit nampil-nampilken bana man pemerentah, tapi i bas TUHAN nari nge reh kebujuren.

²⁷Kalak bujur nembeh atena kalak jahat; kalak jahat nembeh atena kalak bujur.