Read Batak Karo KUAN-KUANEN 30 Bible Online

KUAN-KUANEN 30 - Batak Karo bible

KUAN-KUANEN 30

¹Enda me ranan si ibelasken Agur anak si Jake i Masa nari, “Dibata la lit i jenda, la Ia ras aku, seh keri kal gegehku!”

²“Seri bodohku ras asuh-asuhen, la lit pengertinku.

³La pernah kupelajari kepentaren, sitik pe la lit pemetehku kerna Dibata.

⁴Ise si enggo nangkih ku Surga jenari nusur ka? Pernah kin icikepNa angin alu tanNa, dingen itimpusna lau alu bajuna, ntah netapken baleng doni enda? Adi ietehna kin, ise dage Ia? Ise anakna?

⁵Tep-tep si ipadanken Dibata isehkenna kap. Ia desken ampang-ampang nandangi kalak si ndarami penampat man baNa.

⁶Kune itambahi kai si ikatakenNa, irawaiNa kam jenari icidahkenNa maka kam kalak perguak.”

⁷“O Dibata, ope denga aku mate kupindo man bandu perkara enda, e me:

⁸ola min sempat kubelasken kata la tuhu, dingen ola pelepasNdu aku musil ntah bayak. Berekenlah man bangku kai si kuperluken.

⁹Sabap kune bayak aku banci jadi maka la aku perlu kam. Janah adi musil aku banci jadi nangko aku seh maka juru Dibatangku.”

¹⁰Adi suruh-suruhen ola icekurakina tuanna, maka ola kam kena sumpah ras ngenanami kiniseran.

¹¹Lit kalak si numpahi bapana, dingen la ngergaken nandena.

¹²Lit kalak erpengakap maka ia mejelis, tapi seh kal melketna.

¹³Lit kalak erpengakap mehuli kal ia, jenari iangkat-angkatna bana.

¹⁴Lit kalak si pencarinna, alu ndehken kalak musil-musil si mesera.

¹⁵Lintah darat lit dua anakna; duana gelarna “Bangku kerina”. Lit empat perkara si la pernah puas,

¹⁶kuburen diberu si la banci mupus taneh tenggiring dingen api si jajat ku japa pe.

¹⁷Kalak si la ngergaken nande ntah bapana si enggo metua, bujur nge adi iambekken pe ndarat gelah matana itagut kak jenari bangkena ipangani rajawali.

¹⁸Lit empat perkara si erbahanca mamang kal ateku,

¹⁹rajawali si kabang i awang-awang, nipe si njoler i datas batu karang, kapal si erlayar itengah lawit, dingen anak perana ras singuda-nguda singenan.

²⁰Enda me perbahanen diberu si la atena keleng perbulangenna; erlua-lua ia, jenari ridi ia guna nutupi perbahanenna nina, “Labo lit kai pe kubahan!”

²¹Lit empat perkara si mesera ngalokenca i babo doni enda,

²²budak jadi raja, kalak longor seh kerina sura-surana,

²³diberu si ciga ate kalak lagu langkahna, tapi dungna tersereh; suruh-suruhen diberu si nciati ndehara tuanna.

²⁴Lit empat rubia-rubia i bas doni enda si seh kal cerdikna, e me:

²⁵Perkis, rubia-rubia si labo megegeh, tapi isikapkenna nakanna tupung perlego.

²⁶Bangsa menci, e me rubia-rubia si labo megegeh tapi ibahanna lubangna i bas batu lingling.

²⁷Labang, rubia-rubia si labo lit rajana, tapi banci erbaris alu ratur.

²⁸Cikcak, rubia-rubia si banci itangkap alu tan, banci ijumpai i bas istana raja.

²⁹Lit telu rubia-rubia si tegap perdalanna e me,

³⁰Singa; rubia-rubia si jadi panglima man rubia-rubia si debanna, dingen la ia mbiar man ise pe.

³¹Kambing bajarna, manuk sabugan, bage pe raja i lebe-lebe rayatna.

³²Adi erkiteken bodohndu maka meganjang ukurndu janah jahat sura-surandu, ukurkenlah e.

³³Sabap adi igawerndu susu, salih kap ia jadi mentega. Adi ipekpekndu igung kalak tedareh kap. Adi ipekekendu pernembeh kalak, nandangi rubat me kam.