Read Batak Karo KUAN-KUANEN 31 Bible Online

KUAN-KUANEN 31 - Batak Karo bible

KUAN-KUANEN 31

¹Enda me kata si ibelasken nande Raja Lemuel man anakna,

²“O anakku, buah barangku, si kupupus bekas pertotonku. Uga ningku man bandu?

³Ola buang-buang gegehndu man diberu, ola ambur-ambur duitndu man bana. Enggo melala raja icedaken diberu-diberu.

⁴Ingetlah o, Lemuel. Raja la patut minem anggur seh nagih minem inemen keras.

⁵Sabap adi raja minem inemen keras lupa ia man undang-undang jenari lanai iperdiatekenna kebujuren kalak musil.

⁶Man kalak si tumpat ukurna dingen si erceda ate nge, maka erguna inemen keras.

⁷Pelepas ia minem maka lupa ia kemusilen ras kiniseranna.

⁸Kapitilah kalak si la ngasup nampati dirina. Kawalilah kerina hak kalak si musil-musil.

⁹Sampatilah ia jenari jadilah kam hakim si bujur. Kawalilah hak kalak musil dingen kalak si itindih.”

¹⁰Andiko seh kal serana muat ndehara si cerdik! Sabap ndauh kal ia ergan asangken permata si erndilap.

¹¹Ia kap penalemen perbulangenna, maka asa ndigan pe la akapna mesera.

¹²La pernah jahat perbahanenna man perbulangenna, gedang-gedang umurna mehuli perbahanenna nandangi ia.

¹³Erbintuas ia pepulung benang wol ras lenen, mejingkat ia nenunca.

¹⁴I bas ingan si ndauh nari ipepulungna nakan, bali ras si ilakoken kapal-kapal dagang.

¹⁵Keke ia ope terang wari nikapken nakan guna keluargana, jenari iaturkenna pendahin suruh-suruhenna.

¹⁶Idaramina juma tukuren, e maka itukurna, alu duit si nipepulungna isuanna anggur.

¹⁷Ia megegeh janah tutus erdahin, mejingkat dingen nggit latih.

¹⁸Kerina si ilakokenna ietehna gunana, seh mbages berngi erdahin ia.

¹⁹Benang iserkana, jenari itenunna uis.

²⁰Melumbar tanna mere man kalak musil, mehuli perbahanenna kempak kalak si kekurangen.

²¹Aminna reh paksa perudan la ndele atena, sabap baju panas enggo isikapkenna man keluargana.

²²Ia jine erbahan sprei ingan medemna, bage pe bajuna i bas kain lenen si meherga nari.

²³Perbulangenna kalak terberita ia peminpin kuta.

²⁴Ibahanna baju ras gendit jenari idayakenna man perbinaga.

²⁵Ia megegeh dingen ihamati kalak, janah la aru atena kerna wari si pepagi.

²⁶Alu manjar-anjar ngerana ia, janah dem alu kepentaren.

²⁷Mejingkat ia, janah tetap iperdiateken keperlun jabuna.

²⁸Kerina anakna ngataken bujur man bana, dingen perbulangenna pe mujiken ia.

²⁹“Nterem diberu si mehuli,” nina perbulangenna, “tapi i babo si e kerina kam si mehulina.”

³⁰Rupa si mejile la terteki, dingen kinijilen bene me, tapi diberu si erkemalangen man TUHAN patut ndatken pujin.

³¹Ergakenlah ulih bekas tanna, sabap ia diberu si patut ndatken kehamaten i japa pe!