Read Batak Karo KUAN-KUANEN 4 Bible Online

KUAN-KUANEN 4 - Batak Karo bible

KUAN-KUANEN 4

¹O anakku, begikenlah ajar nande bapandu! Megermetlah, gelah mbages pengertinndu.

²Si kuajarken man bandu e mehuli kal, e maka inget-ingetlah kerina.

³Aku anak sada-sada i bas nandengku; tupung aku kitik denga,

⁴iajarken bapangku aku nina, “Ingetlah kai katangku man bandu, ola lupa. Lakokenlah sentudu ras si kukataken man bandu maka kam nggeluh.

⁵Jadilah pentar janah pebagesi pengertinndu. Ola kam lupa, ola kam nilah i bas kai si kukataken.”

⁶Ola tadingken kepentaren maka kam ikawalina; kelengilah kepentaren maka kam ijagaina.

⁷Si pentingna si la banci lang ilakokenndu e me kap ndatken kepentaren. Kai pe atendu jadi perayakenndu, tapi si la banci langna kal si arus iayakindu e me pengertin.

⁸Kelengilah kepentaren, maka kam iangkatkenna. Ergailah kepentaren maka kam ipehagana.

⁹Iberekenna me man bandu rudang-rudang si mejile, janah itamakenna ku takalndu mahkota si mehaga.

¹⁰Begikenlah aku o anakku. Tutuslah atendu megiken kai si ku kataken man bandu maka gedang umurndu.

¹¹Enggo kuajarken man bandu kepentaren dingen dalan kegeluhen si payo.

¹²Adi nggeluh i bas kepentaren, la kam dat alangen adi kam erdalan; la kam tertuktuk adi kam kiam.

¹³Ingetlah lalap kai si enggo ipelajarindu. Jagai lalap, sabap e kap kegeluhenndu.

¹⁴Ola kam lawes kempak perlawes kalak jahat. Perbahanenna pe ola kal usih.

¹⁵Tulak janah sirangilah si jahat; ola nilah, tapi pinterkenlah perdalanndu.

¹⁶Kalak jahat la tertunduh adi langa erbahan jahat. Langa madat matana adi langa ncilakaken kalak.

¹⁷Kejahaten ras kekejamen desken pangan ras inemen kap man kalak enda.

¹⁸Dalan si idalani kalak bujur seumpama matawari pultak erpagi-pagi, lalap reh terangna seh pantek ciger.

¹⁹Tapi dalan si nidalani kalak jahat bali kap ras berngi si gelap, jongkang ia tapi la ietehna kai si mahanca.

²⁰O, anakku megermetlah, dengkehken rananku. Begiken kai si kukataken.

²¹Ola pelepas rananku sirang ras kam, ingetlah katawari pe dingen bunikenlah i bas pusuhndu.

²²Man kalak si ngantusisa datca kegeluhen dingen kejuah-juahen.

²³Manjar-anjar kam rukur, sabap perukurenndu kap si mabai dalan kegeluhenndu.

²⁴Ola ndigan pe belasken kata la tuhu; pedauhlah i bas kam nari kata guak dingen ranan si mahanca kalak papak.

²⁵Teridah min arah matandu sinalsal kinibujuren ukurndu; tatap ku lebe alu la pada mela-mela.

²⁶Ukurkenlah mbages-mbages ope denga idalankenndu maka kai pe si ilakokenndu tuhu mehuli jadina. [10†]

²⁷Sada jingkang pe ola kam nilah i bas dalan si benar nari.