Read Batak Karo KUAN-KUANEN 5 Bible Online

KUAN-KUANEN 5 - Batak Karo bible

KUAN-KUANEN 5

¹Pegermetken o anakku, perdiatekenlah kepentarenku ras kebeluhenku rukur,

²gelah ietehndu uga erlagu langkah si payo, dingen ranan si encidahken kepentaren.

³Banci jadi, diberu kalak si deban cakapna manis bagi tengguli janah pengeranana daliten asangken minak.

⁴Tapi tinadingna man bandu pagit ras mesui.

⁵Dalan si idalanina dalan kematen kap, e maka irintakkenna kam ku bas doni kematen.

⁶Ia la erdalan arah dalan kegeluhen; la igejapna ia enggo nilah i bas dalan kegeluhen nari.

⁷Genduari o anak-anakku, dengkehkenlah rananku janah ndigan pe ola kam lupa kai si kukataken.

⁸Ola deheri diberu si bage tempasna! Rumahna pe ola deheri.

⁹Adi ideherindu ia bene me kemulianndu janah tupung paksa kam nguda denga kesahndu enggo ibuat kalak si la meteh mekuah.

¹⁰Kinibayakenndu keri ipangani kalak si deban janah ulihndu latih jadi sikerajangen kalak si la itandaindu.

¹¹Ndehereng me kam nimai kesahndu mutus badanndu keri ipangani penakit.

¹²E maka nindu, “Engkai maka la aku pernah erlajar? Engkai maka la aku nggit iajarken kalak?

¹³La aku nggit megiken ajar gurungku. La kuperdiateken pe.

¹⁴Jenari alu la kuarap aku enggo bene kal i tengah-tengah jelma si nterem.”

¹⁵Setialah kempak ndeharandu dingen man bana sajalah atendu ngena.

¹⁶Labo lit gunana adi iambur-amburndu benihndu i bas tiga, bage pe ngerapken sinuan i pasar-pasar.

¹⁷Kam saja ngenca empuna e ras ndeharandu, la banci iraskenndu ras diberu si deban.

¹⁸E maka malem atendu ras ndeharandu janah datndu kemalemen ate i bas singuda-nguda si enggo iempoindu,

¹⁹diberu si mberu, mejingkat desken belkih beru-beru. Bahanlah tenten ndeharandu jadi pengadi-ngadinndu, dingen atena ngena man bandu jadi keriahenna si tetap.

²⁰Kai kin gunana adi ngena gia atendu man diberu si deban o anakku? Man kadendu kin ndeheri diberu kalak aminna mejile gia rupana?

²¹Kai pe si ibahanndu idah TUHAN kap kerina. Ku japa pe perlawesndu, iperdiatekenNa nge kam.

²²Dosa kalak jahat desken siding kap; janah ia jine kap kena siding dosana.

²³Mate ia perbahan la ia ngasup ngkuasai dirina. Kelongorenna mabaken ia ku bas kubur.