Read Batak Karo KUAN-KUANEN 6 Bible Online

KUAN-KUANEN 6 - Batak Karo bible

KUAN-KUANEN 6

¹O anakku, ntah mawen pernah kam erpadan njamini utang kalak.

²Banci jadi enggo kam rutang cakap, janah teriket kerna padanndu jine.

³Adi payo bage o anakku, enggo kam i teruh kuasa kalak ndai. Tapi bagenda carana maka banci kam pulah: minterlah dahi ia, jenari pindolah alu meseksek man bana maka kam ipulahina.

⁴Ola bere matandu tertunduh, selibenndu pe ola pitpit.

⁵Pulahi bandu i bas siding e nari bali ras perik ntah belkih mulahi bana i bas perburu nari.

⁶O kalak perkisat, perdiatekenlah perkis, janah erlajarlah i bas ia nari.

⁷Perkis la lit peminpinna, la lit mandurna, la lit si njagasa,

⁸tapi erdahin ia pepulung nakan tupung paksa lego guna pangan tupung paksa perudan.

⁹O kalak perkisat, asa kai nari dekahna kam medem-medem saja? Ndigan ndia kam keke?

¹⁰Nina, “Kentisik saja aku medem; cirempu aku janah pekesahken kentisik saja.” [11†]

¹¹Tapi tupung ia tunduh rempet reh kemusilen nindih ia desken pengerampuk si ersenjata.

¹²Kalak jahat dingen kalak si la erguna pet kal meritaken berita si la tuhu.

¹³Sikirepen ia erbahan tanda guna nipu kalak.

¹⁴Alu taki pacikna, ibahanna rencana-rencana jahat, i japa pe ibahanna perubaten.

¹⁵Erkiteken perbahanenna, rempet reh cilaka ndabuh man bana e maka mate me ia.

¹⁶ [16-19] Lit pitu perkara si nembeh janah ciga kal ate TUHAN ngenenca e me: pengenehen mata si megombang, dilah perguak, tan si munuh kalak si la ersalah, ukur si erbahanca sura-sura jahat, nahe si mejingkat ngelakoken kejahaten, saksi si la erngadi-ngadi erbual, dingen kalak si peturah perubaten sapih-sapih temanna.

²⁰O anakku, lakokenlah kai si ikataken bapandu, ola la inget kai si iajarken nandendu.

²¹Bunikenlah kata-katana, simpan i bas pusuhndu.

²²Ajarenna e kap si mabai kam i bas perdalanenndu, si ngkawali kam tupung berngi, si mereken pedah man bandu tupung suari.

²³Ajar orangtuandu desken lampu si ersinalsal kap; kam ipandangna lako nuduhken dalan si mehuli man bandu.

²⁴Ajarna e ngasup pedauh kam i bas diberu si la mehuli nari, i bas penaki-naki ndehara kalak si deban nari.

²⁵Ola kam terpikat erkiteken jilena, ola kam terpikat erkiteken pengkirep matana.

²⁶Diberu si pencarinna erlua-lua banci isewa alu sada piring nakan, tapi erlua-lua ras ndehara kalak, kesah kap tebusenna.

²⁷Banci kin itamaken kalak api i bas tentenna, tapi la meseng bajuna?

²⁸Banci kin kalak erdalan i babo rara tapi la meseng nahena?

²⁹Seri kap bahayana e ras medem ras ndehara kalak. Kalak si bage la banci pulah i bas ukumen nari.

³⁰Kalak si nangko nakan perban lihena, labo ia ipemela-mela kalak.

³¹Tapi aminna bage pe, adi ia ketunduken la banci lang igalarina pitu kali lipat, seh maka kerina si i bas ia jadi penggalarna.

³²Tapi sekalak dilaki si erlua-lua ras ndehara kalak, ia ncedaken dirina jine. Seh kal motuna kalak si bage.

³³Mela me iakapna dingen ukumen jadi sikerajangenna, gelarna mbau seh rasa lalap.

³⁴Perbulangen si mecimberu erkiteken pengelako ndeharana e, rawana la tanggung-tanggung, ia erbalas lanai terambati.

³⁵La ia nggit ngaloken galar. Pemere si asa kai pe buena la ngasup erbahan nimpet gara atena.