Read Batak Karo KUAN-KUANEN 7 Bible Online

KUAN-KUANEN 7 - Batak Karo bible

KUAN-KUANEN 7

¹O anakku, ingetlah kai si kukataken ndigan pe ola kam lupa kai si kuperentahken man bandu.

²Lakokenlah bagi si kukataken maka kam nggeluh. Metengetlah kam ndalanken kerina ajarku, bagi tengetna kam njagai matandu jine.

³Ingetlah lalap ajarku, suratkenlah e i bas pusuhndu.

⁴Bahanlah maka kepentaren jadi turangndu dingen pemeteh jadi temanndu meriah.

⁵Kepentaren kap si banci pedauh kam i bas ndehara kalak nari si atena naki-naki kam alu cakap manis.

⁶I bas sada wari natap-natap aku i bas jendela rumahku nari.

⁷Jenari kuidah nterem anak perana mbaru mberkat; tapi si kuperdiateken e me sekalak si bodoh.

⁸[8-9] Kenca wari enggo gelap erdalan-dalan ia deher sada eluk. I je lit tading sekalak diberu.

¹⁰[10-12] Diberu e la meteh mbiar janah la meteh mela. Semal ia erdalan-dalan ntah tedis-tedis i bas simpang-simpang, i pasar-pasar, ntah pe i taneh lapang. Kuidah diberu ndai ndarat, uisna bali ras diberu si pencarinna erlua-lua, jenari ijumpaina anak perana ndai alu sura-sura si macik.

¹³Kenca bage idakepna anak perana ndai, iemaina. Alu la meteh mela nina,

¹⁴“Sendah enggo kupersembahken persembahenku; daging persembahen ndai lit denga i rumahku.

¹⁵E me sabapna maka ndarat aku ndarami kam; janah alu la isangka-sangka enggo kam tedis i lebe-lebengku.

¹⁶I bas ingan medemku enggo kukimbangken uis lenen Mesir si ercurak-curak,

¹⁷dingen enggo kupirpiri alu minak wangi i bas mur, cendana ras kayu manis nari.

¹⁸Genduari nari ersenang-senanglah kita ngenanami kengenan ate gedang-gedang berngi.

¹⁹Perbulangenku la i rumah, ia sangana lawes, ku ingan si ndauh.

²⁰Melala kal ibabana duit, e maka seh dua minggu enda labo ia mulih.”

²¹Bage me penakina-naki diberu e anak perana ndai alu cakap si medate dingen medalit. Dungna tergoda ia.

²²La ia ndauh rukur, ikutkenna diberu e, bali ras lembu si itegu ku bas penggelehen, desken belkih si perlawesna kempak siding.

²³Janah i je reh me anak panah multakken tentenna. Bali ras perik si perkiamna kempak siding, bage me anak perana ndai la igejapna maka nandangi bene me kesahna.

²⁴Erkiteken si e o anak-anakku, begikenlah aku. Perdiatekenlah kai si kukataken.

²⁵Ola pelepas diberu si bage nambat pusuhndu, ola darami ia,

²⁶sabap enggo melala kegeluhen dilaki getem ibahanna. Lanai terbeligai teremna si enggo bene ibahanna.

²⁷Ndahi rumahna, seri kap ras lawes kempak doni kematen, dalan e pinter kempak kematen.