Read Batak Karo KUAN-KUANEN 8 Bible Online

KUAN-KUANEN 8 - Batak Karo bible

KUAN-KUANEN 8

¹Dengkehkenlah! Kepentaren erlebuh, pemeteh erdilo. [12†]

²I datas uruk i tepi dalan, i serpang-serpang tedis me kepentaren.

³I pintu gerbang kuta, i je erlebuh ia,

⁴nina, “O jelma manusia dengkehkenlah, o si ngiani doni, begikenlah sorangku erlebuh.

⁵Langa kin kam dewasa? Erlajarlah gelah dewasa. Kalak lenge kin kam? Erlajarlah ndatken pemeteh.

⁶Dengkehkenlah kata si meherga si kuajarken; janah payo kap kerina si kuturiken.

⁷Si kukataken e, tuhu kap kerina, kata guak seh kal ateku nembehna.

⁸Kasa kai si kukataken payo kerina, la lit si la tuhu tah si papak pemabaina.

⁹Man kalak si erpemeteh, terang kap e kerina; man kalak pentar, seh kap tangkasna.

¹⁰Ergakenlah kai si kuajarken lebihen asangken pirak, ergakenlah pemeteh lebihen asangken emas murni.

¹¹Aku kap kepentaren, aku ergan asangken permata, la terbandingken ras kai pe si iakapndu meherga.

¹²Aku kap kepentaren; pengertin si mbages lit i bas aku, aku cerdik, mehuli kal pemetehku.

¹³Erkemalangen man TUHAN ertina erciga ate man kejahaten, la ngena ateku si megombang ras ukur meganjang. Nembeh ateku kempak lagu langkah si jahat, dingen ranan si la tuhu.

¹⁴Aku kap si mahan rencana dingen ndahikenca, aku cerdik dingen erkuasa.

¹⁵Kusampati raja-raja ndalanken pemerentahen, si erkuasa kusampati ndalanken undang-undang alu bujur.

¹⁶Erkiteken ngaruhku raja-raja erkuasa i doni, bage pe si bayak-bayak ras hakim-hakim kerina.

¹⁷Keleng ateku man kalak si ngkelengi aku, ise pe si ndarami aku jumpa ia ras aku.

¹⁸I bas aku simpar kebayaken dingen kemulian, bage pe kesenangen erkiteken seh sura-sura.

¹⁹Kai si idatndu i bas aku nari ergan asangken emas murni, ergan pe asangken pirak asli.

²⁰Aku erdalan i bas dalan benar, kuikutken dalan si bujur.

²¹Man kalak si ngkelengi aku, kubereken kebayaken melala, rumahna kudemi alu erta-erta si meherga.

²²Aku kap tinepa TUHAN si pemena, bekas tanNa si mula-mulana. [13†]

²³Aku kap si pemena kal ijadiken, si pemena, ope denga doni ibenaken.

²⁴Leben aku tubuh asangken lawit si mbelang, ope denga lit sumbul-sumbul lau.

²⁵Aku enggo tubuh ope denga lit deleng-deleng, ope uruk-uruk ipepajek i bas inganna.

²⁶Ope denga doni ras kendit si mbelang itepa Dibata, ope denga sempukul taneh pe ijadiken.

²⁷Aku enggo ikut i je tupung langit ikimbangken, tupung awang-awang iampeken i babo lawit si mbelang.

²⁸Tupung Dibata namaken embun, i das awang-awang, tupung italangina sumbul-sumbul lau i bas lawit si mbelang,

²⁹tupung iperentahkenNa lau lawit, la banci nimpari baleng si itetapkenNa; aku pe ikut i je, tupung palas doni enda ipajekkenNa.

³⁰Aku lit i deherNa desken sekalak anak buah ateNa; aku kap sumbul keriahenNa, dem keriahen i bas adep-adepenNa,

³¹meriah ukurku ras doni enda, malem ateku ras manusia.

³²Genduari o anak perana, dengkehken min aku, ikutkenlah pedahku, maka malem atendu.

³³Megermetlah man kai si ipelajarindu, jadilah pentar, ola ikaruskenndu.

³⁴Sangap kal kalak si megiken aku, si tep-tep wari tertima-tima i lebe-lebe rumahku.

³⁵Ise si njumpai aku, ndatken kegeluhen, janah man bana ngena ate TUHAN.

³⁶Ise si la njumpai aku, ia rugi jine, kalak si nembeh atena aku, kematen kap atena ngena.”