Read Batak Karo KUAN-KUANEN 9 Bible Online

KUAN-KUANEN 9 - Batak Karo bible

KUAN-KUANEN 9

¹Enggo ipanteki kepentaren rumahna janah enggo ipajekkenna pitu palasna.

²Enggo igelehna asuh-asuhen guna pesta, iraruina anggurna maka itamaken i meja.

³Enggo isuruhna pitu pelayanna diberu erlebuh i datas ingan si meganjangna nari ndilo kerina undangen nina,

⁴“Ise si langa beluh rukur mari ku jenda!” Jenari nina man kalak lenge,

⁵“Mari, pan panganku janah inem lau anggur si enggo kurarui.

⁶Tadingkenlah kalak bodoh jenari ikutkenlah dalan kalak pentar.”

⁷Adi icidahken kesalahen kalak si megombang nembeh ngenca atena. Adi iajarken kalak jahat, ate mesui ngenca datndu.

⁸Kalak si meganjang rukur ola pandang, gelah ola atena nembeh man bandu. Tapi adi icidahkenndu kesalahen kalak pentar tentu keleng atena man bandu.

⁹Adi iajarkenndu kalak pentar, reh pentarna ia. Adi kalak benar iajarkenndu, ertambah-tambah pemetehna.

¹⁰Maka banci kalak jadi pentar la banci lang erkemalangen ia lebe man TUHAN. Adi itandaindu Dibata si Badia e, lit kap pengertinndu. [14†]

¹¹Kepentaren erbahanca umurndu reh gedangna.

¹²Adi lit i bas kam kepentaren, bandu jine nge untungna; tapi adi itulakndu, kam jine nge si rugi.

¹³Kebodohen bali kap ras diberu si pet kal ngerana si la meteh mela.

¹⁴Ia kundul i lebe-lebe pintun rumahna, dingen i bas ingan si meganjang i bas kuta.

¹⁵I jenari ilebuhna kalak si mentas-mentas, kalak si bujur ukurna nina,

¹⁶“Mari singgah lebe, o kam si langa erpemeteh.” Dingen man kalak motu nina,

¹⁷“Entebu kap lau si itangko, tabehen kap nakan si ipan erbuni-buni.”

¹⁸La ieteh kalak si idilona, maka ise si ndeheri rumah diberu e enggo jumpa kematen; janah kalak si enggo bengket ku bas rumahna, enggo gedap ku bas doni kalak mate.