Read Batak Karo PENGERANA 1 Bible Online

PENGERANA 1 - Batak Karo bible

PENGERANA 1

¹Enda me kata Pengerana anak Daud raja Jerusalem.

²Nina, “Oh kerina sia-sia, kai pe sia-sia! Enggeluh pe sia-sia, kerina sia-sia.

³Gedang-gedang geluhta kita erdahin, curcur panasta. Tapi kai kin gunana man banta si e kerina?

⁴Lesap sada kesusuren reh ka kesusuren si deban, tapi doni enda bage nge lalap.

⁵Pultak kang matawari, jenari sundut ka. Latih iakapna mulihken ku bas inganna ndube, jenari pultak ka ia.

⁶Angin rembus ku Selatan, jenari rembus ka ku Utara, erpusing-pusing dungna mulihken ka.

⁷Kerina lau mbelin ku lawit perlawesna, tapi lalap nge lawit labo dem. Dungna mulihken ka ku bas uluna, jenari maler ka.

⁸Kai pe la mereken kepuasen, kerina erbahan leja. Mata la puas ngenen, pinggel la puas megi-megi.

⁹Kai si enggo pernah jadi, denggo jadi ka. Kai si enggo pernah ilakoken, denggo iulihi ka. Kai pe labo lit mbaru i bas doni enda.

¹⁰Lit kalak ngatakenca nina, ‘Nehenlah, enda mbaru!’ Tapi enggo me lit ope denga ia tubuh pe.

¹¹Kai si enggo lepas, lanai iinget kalak. Bage pe kai si jadi genduari ras pagi, lanai bo iinget kalak i bas paksa si reh.”

¹²Aku, Pengerana si enggo jadi raja Israel ringan i Jerusalem.

¹³Enggo kutetapken ateku gelah kupepayo dingen kupelajari kerina si jadi i bas doni enda alu megermet. Kelatihen si ibereken Dibata man manusia la kap mereken keriahen.

¹⁴Kai si jadi i bas doni enda enggo kuidah kerina. Teklah maka si e kerina bali ras si nangkap angin saja ngenca; kerina sia-sia.

¹⁵Si enggo mbengkuk lanai terpepinter, kai si la lit la terbeligai.

¹⁶Rukur aku, “Aku kalak pentar, ndauh pentaren asangken kerina kalak si enggo pernah jadi raja i Jerusalem ope denga aku. Tuhu kuerti kal kai kepentaren dingen kai pemeteh.” [1†]

¹⁷E maka kupelajari ateku kai lainna pemeteh ras kebodohen, bage pe kai lainna kepentaren ras ngulah. Tapi teridah maka kerina e pe bali kap ras si nangkap angin.

¹⁸Sabap reh pentarna kita, reh lalana aru ateta. Reh lalana pemetehta, reh suina ateta.