Read Batak Karo PENGERANA 10 Bible Online

PENGERANA 10 - Batak Karo bible

PENGERANA 10

¹Laneng mate banci erbahan mbau minak wangi sada botol, sitik kebodohen mahanca lasam kepentaren si mbelin.

²Kalak pentar bujur perbahanenna, tapi kalak bodoh jahat pengelakonna.

³Kebodohenna teridah sangana erdalan pe, janah imomokenna kebodohenna man kerina kalak.

⁴Kune kam itembehi raja, ola kam mindo ngadi erdahin. Aminna mbelin pe kesalahenndu banci nge isasapken adi kam teneng dingen saber.

⁵Lit kejahaten si deban kuidah i babo pertibi enda, e me: raja-raja ras si erkuasa ngelakoken si la bujur.

⁶Kalak bodoh ipangkatken, kalak bayak la iperdiateken.

⁷Pernah kuidah suruh-suruhen ngersak kuda, tapi tuan erdalan bali ras suruh-suruhen.

⁸Kalak si ngkuruk lubang, ia jine gedap ku bas, kalak si encedaken tembok, itagut nipe si erbisa me ia. [13†]

⁹Kalak si erdahin i bas tambang batu, terantuk dingen luka me ia. Kalak si naka ranting, kena me ia.

¹⁰Kune sekinndu la ntelap tapi la igarutndu, terpaksa kam erdahin ersuhsah-suhsah. Pergunakenlah ukurndu si jore, jenari bahan leben rencana.

¹¹Adi nipe nagut ope denga ipelemuk alu tabas, lanai lit gunana pawang nipe.

¹²Ranan kalak pentar mahanca ia ihamati, tapi bene kalak bodoh erkiteken rananna jine.

¹³Tangtangna bodoh rananna, kedungenna bagi kalak jahat mehado.

¹⁴Kalak motu ngeranai lalap, wari si pagi ise pe la metehsa. La lit si beluh nurikenca kai si terjadi kenca mate.

¹⁵Kalak bodoh ngenca la meteh dalan ku rumahna, alu la erngadi-ngadi erbintuas erdahin.

¹⁶Cilaka me negeri adi raja anak perana, dingen peminpin-peminpinna erpesta seh erpagi-pagi.

¹⁷Sangap kal negeri adi medolat rajana, peminpin-peminpinna man i bas paksana, si ngasup ngamper bana dingen la peminem-minem.

¹⁸Adi kisat kalak pehuli tarum rumahna si cires, runtuh me rumah e perban la ipekena.

¹⁹Pesta erbahan kalak tawa dingen anggur erbahan meriah ate, tapi guna si e kerina la banci la lit duit.

²⁰Ola sumpahi raja i bas ukur pe, ola sumpahi kalak bayak, i bas ingan medemndu pe. Banci jadi perik-perik megisa kai si ikatakenndu, jenari ipesehna man kalak si isumpahindu.