Read Batak Karo PENGERANA 12 Bible Online

PENGERANA 12 - Batak Karo bible

PENGERANA 12

¹Tupung paksa ngudandu, ingetlah si Nepa kam, ope denga seh tahun-tahun si dem alu kiniseran. Tupung si e pagi bagenda nge nindu, “La kal meriah nggeluh enda.”

²Adi enggo pagi seh paksa si e matandu pe enggo seleng, seh maka magem iakapndu sinalsal terang matawari, bulan dingen bintang-bintang. Embun si gelap lalap ngikut-ngikut kam.

³Tanndu nggirgir lanai ngasup nampar. Nahendu si paguh kote me lanai ergegeh. Ipenndu enggo naktak lanai ngasup cingatngat. Matandu seleng erbahanca meriben pengenenndu.

⁴Sora meriah idalan-dalan lanai megang ibegindu. Sora gendang dingen penggilingen page lanai terbegi. Lanai entabeh pertunduhndu. Sora perik-perik pe erbahanca kam medak.

⁵Ingan si meganjang mbiar kam, e maka terpaksa manjar-anjar perdalanndu. Takalndu ubanen janah nahendu isaren-saren tupung erdalan. Dingen kerina kerincuhen lanai lit. Perlawesta e me kempak pengadi-ngadin si rasa lalap, gedang-gedang dalan kalak erceda ate janah ngandung-ngandung.

⁶Rante pirak sirang me; lampu emas ndabuh jenari meripuk; tinali si enteguhna pe retap, kudin taneh perper merap marpar.

⁷Badanta mulihken jadi abu asalna ndube. Kesah mulih ku Dibata sabap Ia nai si merekenca man banta.

⁸E maka ningku, kerina e sia-sia, kai pe la lit gunana, kai pe la lit ertina.

⁹Si Pengerana enda erpemeteh mbages dingen pentar. E maka iajarkenna manusia kerina si ietehna. Melala pengajaren ipelajarina, jenari iujina payo ntah lang.

¹⁰Idaramina kata-kata si ngasup mereken pengapul, tapi kata si isuratken bujur kap.

¹¹Ranan kalak pentar enda bali kap ras ciken permakan si entelap, ciken si ipakena naruhken biri-birina. Ajar dingen pedah si ipepulungna paguh dingen nteguh desken paku si ipatukken mbages. Kerina e perbahanen Dibata nge. Ia kap ngenca permakanta si tuhu-tuhu.

¹²O anakku, lit sada nari si perlu kal ipergermetkenndu. Kitap la lit tampukna, janah melala erlajar mahanca latih daging.

¹³Kenca kerina enggo kutimbang, enda me tampukna si kudat. Erkemalangenlah man Dibata dingen patuh man peratenNa, sabap guna si e saja me manusia itepa.

¹⁴Dibata kap si ngerunggui kerina perbahanennta; si mehuli ntah si la mehuli, bage pe si terbuni.