Read Batak Karo PENGERANA 3 Bible Online

PENGERANA 3 - Batak Karo bible

PENGERANA 3

¹Sinasa lit i bas pertibi enda jadi i bas paksana.

²Dibata kap si netapkenca paksa tubuh ntah pe paksa mate, paksa ngambur benih dingen paksa ngeruahi,

³paksa munuh bage pe paksa pepalem, paksa ngerontasi bage pe paksa majekken.

⁴Lit paksa erceda ate dingen paksa meriah, paksa ndele ate bage pe paksa landek meriah,

⁵paksa mibit ras paksa la banci mibit, paksa ngema ras paksa la banci ngema.

⁶Lit paksa kebenen dingen paksa ndatkenca, paksa pepulungken dingen paksa ngamburken,

⁷paksa ngerigatken dingen paksa njarumi, paksa sinik bage pe paksa ngerana.

⁸Lit paksa encidahken keleng ate bage pe paksa encidahken nembeh ate, paksa perang dingen paksa dame.

⁹Kai kin untungta latih gia kita?

¹⁰Kueteh maka Dibata si merekenca dahin makana kote kita.

¹¹Ia nge si mereken kai pe i bas paksa si payo. Ia nge si mereken man banta kerincuhen lako meteh warinta si pepagi, tapi la pernah iberekenNa man banta kepuasen lako ngertiken perbahanenNa.

¹²Kueteh maka la lit si terulin man banta seakatan ersenang-senang janah ngenanami kesenangen kegeluhen enda asa umur geluhta.

¹³Kita kerina banci man dingen minem janah ermeriah-meriah ngenanami kerina ulih latihta. Kerina e pemere Dibata kap.

¹⁴Kueteh maka kerina perbahanen Dibata tetap rasa lalap seh rasa lalap. Manusia sitik pe la ngasup engkurangi ntah nambahisa kai si ibahan Dibata e. Bage perbahanen Dibata, gelah malang kita man baNa.

¹⁵Si jadi genduari bage pe si jadi pagi, nai pe enggo me jadi. Dibata nge si njadikenca kasa kai si enggo jadi janah jadi ka pagi mulihi.

¹⁶Lit ka si kuidah i bas pertibi enda e me: aturenna lit i je kinibujuren dingen kiniulin, tapi i je nge lit kejahaten.

¹⁷Rukur aku, Dibata kap si ngerunggui kalak bujur ras kalak jahat, sabap kai pe ras perbahanen si kuga pe jadi i bas paksa si nitentuken Dibata.

¹⁸Rikutken pengakapku maka Dibata nguji kita lako encidahken labo lit lainna kita ras rubia-rubia.

¹⁹Sabap kai si jadi man rubia-rubia e ka nge jadi man manusia. Rubia-rubia mate, bage ka nge pe manusia. Rubia-rubia ras manusia duana tinepa Dibata kap. Dage labo ulin manusia asangken rubia-rubia, sabap duana nggeluh sia-sia.

²⁰Labo lit lainna ingan si itujuna, e me abu. Asalna i bas abu nari janah mulihken ka nge ia ku abu.

²¹Labo sieteh, ntah kesah manusia nangkih ku das tah pe kesah rubia-rubia nusur ku teruh taneh.

²²Erkiteken si e kugejapken maka la lit si terulin seakatan nggeluh ermeriah-meriah ngenanami ulihta latih. Sabap e me sikerajangenna. Kutera pe labo banci ietehna kai denggo jadi kenca enggo mate.