Read Batak Karo PENGERANA 4 Bible Online

PENGERANA 4 - Batak Karo bible

PENGERANA 4

¹Jenari kuperdiateken ka kerina kinilabujuren si jadi i bas pertibi enda. Kalak si itindih tangis tapi la lit sinampatisa. La lit sekalak pe nampati erkiteken belinna kuasa si nindih e.

²Morah ateku nandangi kalak si enggo mate, sabap ulin kap sikerajangenna asangken kalak si nggeluh denga.

³Tapi simalemna kal atena e me kalak si langa tubuh, sabap langa idahna kejahaten si ilakoken i bas pertibi enda.

⁴Kueteh maka nterem manusia seh kal iakapna latihna erdahin erkiteken mecimberu ia ngidah ulih latih temanna saja. Kerina e sia-sia nge desken nangkap angin.

⁵Ikataken kalak maka si motu ngenca kundul cirempu, janah igengkenna mate la man.

⁶Banci jadi payo nge katana e, tapi ulin me la mbue erta, tapi teneng nggeluh asangken duana tan erbentuas erdahin tapi desken nangkap angin.

⁷Lain asangken si e lit denga ka nge si sia-sia i bas kegeluhen enda.

⁸Lit kalak nggeluh sisada-sisada, la lit anak la lit seninana. Tapi aminna bage pe, latih kal iakapna erdahin dingen la pernah puas pusuhna ngenen ertana. Guna ise kin ia erdahin alu curcur panasna, janah itulakna kerina kesenangen? E pe sia-sia nge, dingen kalak si bage me si nggeluh i bas kiniseran.

⁹Ulin dua kalak asangken sekalak-sekalak, sabap adi dua kalak erdahin mbelang bekasna.

¹⁰Kune sekalak guling banci sekalak nari nampati. Tapi sisada-sisada ngenca, kenca guling ise nari si nampatisa.

¹¹I bas berngi paksa mbergeh dua kalak si rembak medem banci mereken las man si debanna, tapi uga perbahan kalak erbahanca melas badanna adi ia sisada ngenca?

¹²Dua kalak erdalan banci ia ras-ras ngelawan adi lit si nerang ia, tapi adi sekalak ngenca melukah nalukenca. Tinali si ipiuh telu mesera ngeretapkenca.

¹³ [13-14] Kalak musil banci jadi raja, janah sekalak tabanen banci nangkih ku das kinirajan. Tapi adi kenca metua raja e la nggit ngaloken ajar perban motuna, maka la ia ulin asangken sekalak anak perana si musil tapi pentar.

¹⁵Rukur aku kerna kerina manusia i bas doni enda, jenari kueteh maka lit nge sekalak anak perana si nggantiken raja pagi.

¹⁶Banci jadi maka la terbeligai teremna rayat si iperentah raja, tapi kune ia lanai jadi raja labo lit sekalak pe si ngataken bujur kerna kai si enggo ilakokenna. E maka kerina nge sia-sia desken nangkap angin.