Read Batak Karo PENGERANA 5 Bible Online

PENGERANA 5 - Batak Karo bible

PENGERANA 5

¹Megermetlah adi kam bengket ku bas Rumah Pertoton. Madin bengket ku bas guna erlajar asangken mereken persembahen bagi si ilakoken kalak lenge, si la meteh apai payo, apai si la payo.

²Ukurken lebe maka belasken janah ola metersa erbahan padan i adepen Dibata. Ia i Surga dingen kam i doni; e maka ola melalasa rananndu.

³Adi reh lalana aru ate, reh lalana banci jadi nipi gulut. Reh buena ngerana, banci jadi reh buena luar ranan si lenge.

⁴Dage adi kam erpadan man Dibata, minter sehken padanndu e. La ngena ateNa kerna kalak lenge. E maka sehkenlah padanndu. [9†]

⁵Madin la erpadan asangken la ngkundulisa.

⁶Ola bere maka ranandu erbahanca kam erdosa, seh maka terpaksa ikatakenndu man imam maka silap kam erbahan padan. Man kadendu erbahan nembeh ate Dibata bandu seh maka ikernepkenNa kai si enggo idahikenndu?

⁷Bali ras mbue ernipi la lit gunana, bage me pe melala ngerana la lit ertina. Tapi erkemalangenlah man TUHAN.

⁸Ola mamang atendu adi idahndu kalak musil itindih pemerentah dingen la bujur perbahanenna man bana. Tep-tep pegawai ikapiti atasenna nge ia, jenari si datasenna ka ngkawali pegawai si niteruhna ndai duana.

⁹Maka nggeluh pe raja perbahan lit nge siman peranin.

¹⁰Kalak si meduit la pernah bias akapna; kalak si erngena ate man erta la pernah idatca kai si isurana. Kerina sia-sia.

¹¹Reh bayakna jelma reh buena kalak man berenna man. Labo lit untungna man bana, saja itehna maka mbue ertana, bage ngenca.

¹²Sekalak si erdahin banci jadi la bias nakanna, tapi si lang-langna entabeh pertunduhna gedang-gedang berngi. Tapi kalak bayak mbue tuhu ertana, tapi la banci tunduh erkiteken aru atena.

¹³Enda me sada perkara si mejin i bas doni enda: Kalak si pebue erta i bas paksa kalak kekurangen.

¹⁴Kune bene erta e cilaka kap man bana; lanai lit si man tadingenken man anak-anakna.

¹⁵Tupung kita tubuh, manjang-anjang kap kita; bage me pagi tupung kita nadingken doni enda; kai pe labo sibaba i bas bekasta latih nari. [10†]

¹⁶E la bujur! Perlawesta bali ras pertubuhta ndube. Sigegehi erdahin guna nangkap angin, kai kin sidat?

¹⁷Kidekah kita nggeluh kita lit i bas kegelapen, kesusahen, aru ate, nembeh ate dingen penakit.

¹⁸E maka kueteh maka la lit terulin man banta seakatan minem dingen manken ulih pendahin dingen ngenanami ulihta latih kidekah geluhta si gendek si ibereken Dibata man banta. E me sikerajangenta.

¹⁹Adi sekalak ngaloken kebayaken dingen erta i bas Dibata nari, janah ibereNa ia ngenanami kebayakenna e, arus ia ngataken bujur janah ermeriah ukur ngenanami ulihna latih. E pe pemere Dibata kap e.

²⁰Dibata si ndemi pusuhna alu keriahen, gelah ola aru atena ngukurkenca kerna uga gendekna geluh enda.