Read Batak Karo PENGERANA 6 Bible Online

PENGERANA 6 - Batak Karo bible

PENGERANA 6

¹Kuidah maka kinilabujuren si mesangat ilakoken i bas pertibi enda.

²Man deba kalak ibereken Dibata kebayaken, kehamaten dingen melala erta janah kai pe atena banci ibuatna. Tapi la ibere Dibata ia ngenanami kerina pemereNa e. Tapi kalak si la itandaina nge si ngenanami kinibayakenna ndai. E maka kerina nge sia-sia dingen la payo.

³Aminna pe sekalak jelma lit anakna seratus kalak dingen cawir ka ia metua tapi adi labo malem atena dingen la ia ndatken penguburen, rikutken pengakapku ulin anak-anak mate tubuh asangken kalak ndai.

⁴Sabap nandangi anak-anak mate tubuh labo dalih man bana tubuh ntah lang; lawes ia kempak dalan kegelapen jenari minter ilupaken.

⁵Langa pernah idahna sinalsal matawari, bage pe langa pernah ietehna ertina nggeluh enda, seh maka malem atena medem i bas ingan pengadi-ngadinna.

⁶Ulin e asangken kalak nggeluh dua ribu tahun tapi la pernah malem atena. I babo si e kerina, duana nge seri perlawesna.

⁷Manusia erdahin guna man ngenca, tapi la pernah bias.

⁸Dage kai lebihna kalak pentar asangken kalak motu? Kai kelebihen kalak musil amin mehuli gia laguna?

⁹Kerina nge e sia-sia bali ras nangkap angin. Madin puas siakap kerna kai si lit i bas kita asangken lalap kam merincuh nandangi si debanna.

¹⁰Sinasa lit enda, nai enggo leben lit. Sieteh maka manusia labo ngasup erperkara ngelawan kalak si gegehen asangken ia.

¹¹Reh usurna ia ngelawan reh lanai litna ertina rananna, kai pe la lit untungna man bana.

¹²Uga pemeteh kalak kai si mehulina i bas kegeluhen si kentisik dingen la erguna enda? Ma bali kin ras awih perlawesna? Uga pemeteh kalak kai si jadi i bas doni enda adi ia enggo mate?