Read Batak Karo PENGERANA 7 Bible Online

PENGERANA 7 - Batak Karo bible

PENGERANA 7

¹Gelar si merim ulin asangken minak wangi si meherga; wari kematen ulin asangken wari ketubuhen. [11†]

²Madin ndahi ingan kalak si rate ceda asangken ndahi ingan kalak erpesta. Sabap arus maka usur siinget maka kematen enggo nimai kerina kalak.

³Ndele ate ulin asangken tawa-tawa. Amin pe ayo berjut, tapi tambah-tambah pengertin.

⁴Kalak lenge gelgel ia ngayaki kesenangen. Kalak pentar iukurina kematen.

⁵Madin kita ipandang kalak si erpemeteh, asangken ipuji kalak motu.

⁶Adi tawa kalak motu la lit ertina, bali kap e ras ranggas erkuritik ipan api.

⁷Adi kalak pentar nipu, bodoh kap perbahanenna e. Adi kalak ngaloken sogok, icedakenna kap biakna si mehuli.

⁸Kai-kai pe, ulin kap pendungina asangken pemenana; ulin ate saber asangken ukur meganjang.

⁹Ola pedas-pedassa das darehndu, sabap nembeh ate ringan kap i bas pusuh kalak lenge. [12†]

¹⁰Ola sungkun, “Engkai maka ulin si nai asangken si genduari?” Kalak lenge ngenca bage penungkunenna.

¹¹Kalak nggeluh arusna pentar; ergana pemeteh bali kap ras barang pusaka.

¹²Pemeteh mereken ketenangen bali ras duit. Kalak si i bas ia kepentaren dingen pemeteh, ia terkelin.

¹³Perdiatekenlah kai si ibahan Dibata. Sabap ise kin beluh pepinter kai si enggo ipegeduk Dibata?

¹⁴E maka malemlah atendu tupung kam sangana sangap. Tapi tupung kam kena cilaka ola kam lupa maka Dibata nge si merekenca e kerina. La si eteh kai si banci jadi pagi.

¹⁵Sia-sia nge geluhku enda, tapi i bas si e enggo kuidah kerinana. Lit kalak bujur pedas mate aminna pe bujur ia. Tapi lit kalak jahat ndekah nggeluh aminna pe lalap ia erbahan kejahaten.

¹⁶Ola mehulisa dingen ola pentarsa. Man kai munuh bana?

¹⁷Ola ka jahatsa dingen motusa. Man kai mate ope denga terpaksa?

¹⁸Silahkenlah si dua e. Adi erkemalangenlah kita man Dibata la banci la terkelin nge kita.

¹⁹Belinen kuasa kepentaren nandangi sekalak jelma asangken kuasa sepuluh raja nandangi sada kuta.

²⁰I bas pertibi enda labo lit kalak serta, si katawari pe mehuli perbahanenna dingen la pernah ersalah.

²¹Ola padah nggit kal megiken ranan kalak, banci jadi kam sangana icekuraki sekalak suruh-suruhenndu.

²²Kam pe igejapndu nge, maka kam pe megati encekuraki kalak si deban.

²³Kerina enggo kupergermetken alu kepentarenku, tapi akin kuayaki kepentaren reh dauhna ia i bas aku nari.

²⁴Ise si ngasup metehsa kai ertina nggeluh enda? Mbagessa ia, e maka la ngasup kita ngertikenca.

²⁵Amin bage pe tetap nge aku erlajar muat pemeteh gelah ndatken kepentaren dingen meteh jabapen kerina penungkunenku, gelah kueteh uga jahatna ras lengena kebodohen.

²⁶Kueteh maka pagiten kap diberu asangken kematen. Keleng ate si icidahkenna bali kap ras jala dingen siding si ngkenai kam; tan diberu e ndakep kam desken rante si nteguh. Kalak si ngikut peraten Dibata pulah i bas sidingna nari tapi kalak perdosa tentu kena sidingna.

²⁷Tuhu nina Pengerana: Sitik-sitik tambah pengertinku kerna si enda tupung aku ndarami jabapna.

²⁸Kudarami ka jabap si deban tapi la dat aku. I bas seribu dilaki jumpa aku sekalak si man hamaten tapi diberu sada pe lang.

²⁹Enda ngenca si kudat: Itepa Dibata manusia jadi kalak bujur-bujur tapi kita jine mahanca banta serbut dingen rilet-ilet.