Read Batak Karo PENGERANA 8 Bible Online

PENGERANA 8 - Batak Karo bible

PENGERANA 8

¹Andiko seh senangna iakap kalak pentar. Kerina perkara ietehna njabapsa. Kepentaren erbahanca ia cirem siang ayona, sierbahanca ngadi berjutna.

²Lakokenlah kai si iperentahken raja, janah ola merudu-rudu erbahan padan man Dibata.

³Lit kuasa raja erbahan kai atena, e maka madin lawes i bas ia nari adi merawa ia.

⁴Raja erbahan kai pe alu kuasa, ise pe la pang ngelawan kai si ikatakenna.

⁵Kalak si patuh man bana, teneng akapna; kalak pentar me ia dingen itehna ndigan ras katawari ngelakoken si e.

⁶Ndahiken kai pe tehna ndigan ras katawari paksana, tapi sitik ngenca si metehsa si e kerina.

⁷La lit ise pe metehsa kai si jadi pagi, la lit ise pe beluh nurikenca.

⁸La lit ise pe si ngasup ngambati kematenna, ntah nuncun wari kematenna. Enda me sada peperangen si la tersilahken; penipu pe la terpulahisa bana i jenari.

⁹Kerina si enda kuidah tupung aku rukur kerna kai si jadi i bas pertibi enda. I bas pertibi enda kuidah maka lit sekalak si erkuasa janah kalak si deban ngenanami kiniseran erkiteken kuasana.

¹⁰Pernah kuidah kalak jahat mate dingen ikuburken. Tapi tupung aku mulih i bas kuburen nari, kubegi ia ipujiken kalak i bas kuta inganna erbahan jahat ndube. Dage e pe sia-sia nge kerina.

¹¹Engkai maka bage kal iakap kalak murahna erbahan jahat? Sabapna e me erkiteken kejahaten la minter iukum.

¹²Aminna pe seratus kejahaten ilakoken kalak perdosa, tapi tetap nge ia nggeluh. Tuhu ikataken kalak nina, “Adi kam erkemalangen man Dibata, kerina erdalan alu mehuli.

¹³Tapi, kalak jahat ndatken kiniseran. Geluhna pedas-pedas perlawesna bagi awih. La metua pe, mate kap ia, perban la erkemalangen man Dibata.”

¹⁴Tapi kerina e guak kap. Nehenlah kai si jadi i babo pertibi enda: lit kalak bujur ndatken ukumen si arusna kin man kalak jahat; lit kalak jahat ndatken upah si arusna kin man kalak bujur. Janah e pe sia-sia.

¹⁵E maka rikutken pengakapku arus kalak ermeriah ate. Erkiteken kidekah geluhna i bas doni enda, la lit kesenangen si deban man bana, seakatan man, minem dingen ermeriah ate. Kerina bekasna latih e ngenca banci inanamina, i bas kinigeluhen si ibereken Dibata man bana i bas doni enda.

¹⁶E maka tupung kucubaken ndarami kepentaren janah mpelajari kai si jadi i bas pertibi enda, kueteh maka aminna pe kita la tunduh suari ras berngi la ngadi-ngadi,

¹⁷labo kita ngasup ngantusisa kai si ibahan Dibata. Kugapa pe pengelatihinta, labo terantusi kita. Iakap kalak pentar ietehna tapi si tuhuna labo iertina.