Read Batak Karo ENDE-ENDEN SALOMO 3 Bible Online

ENDE-ENDEN SALOMO 3 - Batak Karo bible

ENDE-ENDEN SALOMO 3

¹Tupung berngi medem aku i bas ingan medemku, ernipi aku kerna impalku si kukelengi. Kudarami ia tapi la aku jumpa.

²Keke aku, jenari kudarami belang-belang kuta, lanai lit dalan ras lorong si la kutapaki, kudarami impalku tapi la aku jumpa.

³Jumpa aku ras si ngeronda kuta, janah kuperkuanken ia, ningku, “Idahndu kang impalku?”

⁴E denga nge kalak ndai kutadingken, rempet aku jumpa ras impalku. Kudakepi ia lanai kupulahi; seh maka kubaba ia ku rumah nendengku, ku bilik inganku tubuh.

⁵O diberu-diberu Jerusalem, erpadanlah, ersumpahlah erkiteken belkih ras balua si meliar, maka la atendu ngganggu kami, kami si sangana si ngenan.

⁶Ise ah si sangana erdalan i mbalmbal nari, si seri tempasna ras binangun asap? Merim kal bali ras kumenen ras mur, kumenen si idayaken perbinaga.

⁷Nehenlah! Ena me reh Salomo, ilanja tare kursi kinirajanna. Lit enem puluh kalak pengawalna, kerina tentera Israel si mbisa.

⁸Kerina si beluh kal mpergunaken pedang, janah erpengalamen i bas perang. Tep-tep kalak maba pedang, sikap ngelawan serangen tupung berngi.

⁹Raja Salomo ilanja tare kursi kerajan si ibahan i bas kayu si mejilena nari.

¹⁰Tiangna ilapisi alu pirak, inganna tertande iukir alu benang emas. Inganna kundul ibahan i bas kain si meherga nari sinulamsa e me diberu-diberu Jerusalem si dem alu keleng ate.

¹¹O beru Sion, mari nehenlah Raja Salomo. Sangana ipakeken mahkotana, si itamaken nandena i babo takalna. Tupung ia erjabu, e me tupung wari ia ermeriah-meriah, itamaken nandena mahkota e.