Read Batak Karo ENDE-ENDEN SALOMO 4 Bible Online

ENDE-ENDEN SALOMO 4 - Batak Karo bible

ENDE-ENDEN SALOMO 4

¹Seh kal kam jilena, o impalku, seh kal jilena! Matandu nalsalken keleng ate i balik uis nipes si nutupi ayondu. Bukndu miap-miap desken rarasen asuh-asuhen, si sangana nusur i datas deleng-deleng Gileat nari.

²Ipenndu mbentar desken biri-biri i bas permakanen, biri-biri si mbaru denga ipangkas janah iperidi. Beliganna kuh kerina, kerina ratur dingen sikap perturahna.

³Biberndu megara desken pita megara, seh kal jilena tupung kam ngerana. Pipindu ersinalsal i balik tutup ayondu.

⁴Kerahungndu desken menara Daud, kibul janah melinang. Bura si bali ras seribu ampang-ampang, gantung i je.

⁵Tentenndu bali ras dua anak belkih, belkih si rindu nggagat i tengah bunga encole.

⁶Mejehe aku ringan i deleng mur, i bas deleng kumenen, seh maka rembus angin erpagi-pagi, tupung kegelapen enggo lesap.

⁷Oh, andiko, seh kal kam jilena, o impalku, andiko, mberu kal kam.

⁸O kemberahenku, rehlah kam i das Deleng Libanon nari, rehlah kam i Libanon nari. Nusurlah i datas deleng Amana nari, i Deleng Senir ras Hermon nari, e me ingan arimo ras singa tading.

⁹O kemberahenku, kekelengenku, penatap matandu ras bura si ipakendu, erbahanca maka tambat pusuhku.

¹⁰Keleng atendu erbahanca debet-debet pusuhku, o kemberahenku, o impalku. Keleng atendu tebun asangken anggur, kam merim lebihen asangken kerina minak rempah-rempah.

¹¹Biberndu entebu desken tengguli, o impalku buah barangku, dilahndu desken susu campur tengguli kap kuakap, bau Libanon si merim leket i bas uisndu.

¹²Impalku, kemberahenku peken si terbuni kap, peken si erbenteng, sumbul si ibide.

¹³ [13-14] Mehumur sinuan-sinuanna, desken peken batang galiman, buah si mejilena kap ulihna. La kurang i je kacar, narwastu, kayu manis, tebu, kuning gersing, kumenen, mur ras rempah-rempah pilihen si melala erbagena.

¹⁵Arah peken e maler lau i bas sumbul nari lau anak erburak-burak i das deleng Libanon nari.

¹⁶O angin Selatan ras angin Utara, kekeken, rembuslah i bas pekenku maka teranggeh bauna si merim. Dilo min impalku ku bas pekenna jine, gelah inanamina buah si mejilena.