Read Batak Karo ENDE-ENDEN SALOMO 5 Bible Online

ENDE-ENDEN SALOMO 5 - Batak Karo bible

ENDE-ENDEN SALOMO 5

¹O kemberahenku lawes aku ku pekenku, i je kupan cambang wani ras tengguli. Kuinem susu ras lau anggur, kupepulung rempah-rempah ras mur. Pangani ras inemlah o teman-teman kerina, seh maka kerina kam mabuk ate ngena.

²Medem aku tapi pusuhku la tertunduh, ernipi aku impalku nuktuk pintun jenari nina. Pelepas aku bengket, o jadi ateku, tambaten pusuhku, manuk mbulanku. Enggo litap takalku kena embun bukku enggo lembab kena remang.

³Pakenku enggo kutangtangi, ngkai ka maka kupake mulihi? Nahengku enggo kuburihi ngkai maka kumelketi?

⁴Enggo ijemak impalku pintun, e maka debet-debet pusuhku perban ia enggo ndeher,

⁵janah enggo sikap aku nalangi pintun. Tanku kusapui alu mur, i bas jari-jaringku nari mur naktaken, tupung kujemak eruk-eruk pintun.

⁶Kutalangi pintun maka ku bas impalku ateku, tapi lanai ia i je. Lanai kal langlang rincuhna aku megiken sorana, kudarami ia, tapi sia-sia. Kulebuhi ia tapi la lit sora ngaloi.

⁷Jumpa aku ras si njaga benteng kuta, ipekpeki dingen ilukaina aku. Selendangku isintapkenna jenari icaingkenna.

⁸O diberu-diberu Jerusalem, erpadanlah kam, adi jumpa kam ras impalku, katakenlah man bana maka aku sanga mabuk asmara.

⁹O kam singuda-nguda si mejilena, lain kin impalndu ras si debanna? Kai kin i bas ia si man ayaken, maka terpaksa kami erbahan padan?

¹⁰Mbestang dingen megegeh kap impalku, sada i bas sepuluh ribu kap ia.

¹¹Ayona melinang desken perunggu, bukna keriting dingen mbiring, bali ras perik kak.

¹²Matana seri jilena ras nderpati i tepi lau mbelin si maler, nderpati si mbaru meridiken lau susu, jenari cinep i tepi lau.

¹³Pipina bali jilena ras peken rempah-rempah si merim, biberna desken bunga encole erlau-lau ibahan mur.

¹⁴Tanna mejile, mejile tempasna, ipakena gelang emas dem alu permata, dagingna mbestang desken gading si itamburi alu nilam.

¹⁵Pahana bali ras marmar mentar si ipajekken i bas palas emas mehaga kal ia bali ras Deleng Libanon, rikut ras batang kayu arasna si meganjang.

¹⁶Biberna ntebu ngemaisa, asa si lit ibassa, tertambat ibanna pusuhku. Bage me tempasna impalku e, o diberu-diberu Jerusalem.