Read Batak Karo ENDE-ENDEN SALOMO 6 Bible Online

ENDE-ENDEN SALOMO 6 - Batak Karo bible

ENDE-ENDEN SALOMO 6

¹O kam singuda-nguda si mejilena, ku ja perlawesna impalndu? Turiken man kami, maka kami ikut ndaramisa.

² [2-3] Impalku e lawes ku reba, i jah turah melala rempah-rempah i bas peken e ipermakanina biri-birina, janahna pepulung bunga encole. Impalku e aku empuna, dingen aku pe ia empuna.

⁴O impalku kam gayang kal bali ras kuta Tirsa, desken Jerusalem si mejile! Hebat desken pasuken tentera ras panji-panjina.

⁵Ola min tatapndu aku, sabap jengang aku perbahan pengenenndu. Bukndu miap-iap desken rarasen asuh-asuhen, si nusur i das uruk-uruk Gileat nari.

⁶Ipenndu mbentar ersinalsal, bali bentarna ras biri-biri si mbaru denga iperidi. Kuh janah serta, kerina enteguh dingen ratur.

⁷Pipindu mberu bagi galiman itamburi bulungna, itutupi selendang teridah rupandu mejile.

⁸Aminna pe lit enem puluh kemberahen raja, tambah gundikna waluh puluh nari, ras singuda-nguda si la terbeligai buena,

⁹tapi sada ngenca ateku jadi, gayang kal ia desken nderpati, anak si sada si ikelengi nandena. Ia kalak sikap janah kerina diberu mujikenca, subuk kemberahen bage pe gundik raja, mejile iakapna ia.

¹⁰ [10-11] Lawes aku ku peken kenari, kuperdiateken tunas-tunas si turah i bas berneh-berneh; ntah mawen enggo erpucuk batang anggur ntah mawen enggo erbunga batang galiman. Ise kin ndia si penatapna desken matawari sangana pultak, desken bulan purnama si lanai tanggung jilena, bali ras matawari si sangana har-har?

¹²Nggirgir aku, mejehe aku man keleng atendu, desken kalak pergereta perang merincuh erperang.

¹³Landek, landek o beru Sulam, bahan maka kuidah kam landek. Engkai maka kam merhat ngidah perlandekku i tengah-tengah kalak si ndedah-ndedah?