Read Batak Karo ENDE-ENDEN SALOMO 7 Bible Online

ENDE-ENDEN SALOMO 7 - Batak Karo bible

ENDE-ENDEN SALOMO 7

¹Impalku, seh kal kam mberuna, perdalanndu seh kal jilena tupung kam erselop. Percengkung pahandu desken sada perhiasen, bekas bahenen sekalak tukang si beluh.

²Pusungndu desken mangkuk si mejile, katawari pe dem alu anggur si icampur ras rempah-rempah. Awakndu bali ras sada raden ikeleweti bunga-bunga encole.

³Polandu bali ras dua belkih, bali ras balua si rindu dua.

⁴Kerahungndu desken menara gading, matandu desken telagah i kuta Hesbon, deherken pintu gerbang kuta si mbelin e. Igungndu mejile seri ras menara i Libanon, si pajek engkawali kuta Damaskus.

⁵Takalndu meganjang desken uruk Karmel bukndu si idandan erndilap desken sutra alus. Perban jilena raja pe leket matana ngenenca.

⁶Mejile kal kam, seh kal mberuna kam si ikelengi i bas kerina si ate ngena.

⁷Potongen dagingndu desken batang kurma polandu seri ras tandan buah kurma.

⁸Kunangkihi ateku batang kurma e, jenari kuputikken ateku tandanna. Polandu desken sengkerangke buah anggur kesahndu merim bagi bau buah apel,

⁹biberndu entebu desken buah anggur! Maler min man impalku lau anggur, maler ku bas biber ras ipenna.

¹⁰Impalku kap si empuna aku, aku kapen sura-surana.

¹¹Ota impal, lawes kita ku mbalmbal, jenari erberngi kita i tengah rudang-rudang.

¹²Lampas kita medak, gelah sinehen batang anggurta ntah mawen enggo reh tunasna, ntah mawen enggo terlak bungana, ntah mawen batang galiman enggo erbunga. I je kubereken keleng ateku man bandu impalku.

¹³Kayu si merim uratna, buah si entebu nanamna lit deherken pintunta. O impal enggo kusikapken man bandu, subuk si enggo ndekah bage pe si mbaru denga iputikken.