Read Batak Karo ENDE-ENDEN SALOMO 8 Bible Online

ENDE-ENDEN SALOMO 8 - Batak Karo bible

ENDE-ENDEN SALOMO 8

¹Adi turangku sada nande sada bapa min ndai kam, si pernah pepinemken i bas pola nandengku, kuemai kam adi kita jumpa i tengah dalan, janah la lit si emperdiatekenca.

²Kurumah nandengku kam kubaba, maka banci iajarindu aku kerna ate keleng. Kubereken man bandu anggur campur rempah, lau buah delima man inemenndu.

³Tanndu si kawes natang takalku, tanndu si kemuhun napu-napu aku.

⁴O diberu-diberu Jerusalem erpadanlah kam, maka la atendu ngganggu kami si sangana singenan.

⁵Ise si reh i bas gurun pasir ah nari? Sicikepen tan ia ras impalna. I teruh batang apel kuingeti kam i je kap inganndu tubuh ndube.

⁶Ola talangi pusuhndu man ise pe seakatan man bangku ngenca. Ise pe ola cikepndu seakatan aku, ngena ate seri gegehna ras kematen, mecimberu bali rawana ras doni kematen. Apina ndilat-ndilat desken dilah api, gurlah desken api si gara.

⁷Api si bage la ternimpeti alu lau, banjir pe la ngasup nggedapkenca. Tapi adi lit kalak si ncubaken nukur keleng ate alu kebayakenna, kinilingen saja nge si ialokenna.

⁸Lit turang kami kitik denga polana Kai nge ndia si ibahan kami, kune lit kalak si nungkuni ia?

⁹Bicara tembok kuta min ndai ia, ibahan kami i babona menara pirak. Bicara pintu gerbang min ndai ia, ibide kami ia alu kayu cemara.

¹⁰Aku kap tembok, janah polangku kap menarana. Ieteh impalku nge maka adi ras ia dat aku kepuasen ras dame.

¹¹Lit sada peken anggur Salomo i bas sada ingan, Baal-Hamon gelarna. Piga-piga kalak perjuma newai peken anggur e i bas ia nari, tep-tep kalak nggalar seribu duit pirak.

¹²Aminna pe Salomo reh alu duitna si meribu-ribu janah si erdahin i bas jumana iupahi dua ratus duit, la diateku pe e; sabap lit kap peken anggurku jine.

¹³O impal, pedengkehken maka kubegi sorandu i bas peken nari, temanku enggo sikap megiken kam ngerana.

¹⁴Mari impalku, pedas kam reh, kiamken bagi belkih tah pe bagi belkih si nguda denga kiamken arah babo deleng-deleng ingan turah rempah-rempah.