Read Batak Karo JESAYA 1 Bible Online

JESAYA 1 - Batak Karo bible

JESAYA 1

¹Enda me berita kerna Juda ras Jerusalem si ipetangkas Dibata man Jesaya anak Amos tupung Usia, Jotam, Ahas ras Hiskia jadi raja Juda. [1†]

²Nina TUHAN, “O langit ras doni, begikenlah katangKu! Anak si Kupebelin-belin enggo ngelawan Aku.

³Lembu itandaina ise empuna, janah kelede meteh i ja ia ibere tuanna man. Tapi bangsangKu Israel kai pe la ietehna; sitik pe la lit pengertinna.”

⁴Cilaka me kam, o bangsa perdosa, kam si erlagu langkah macik dingen jahat! Dosa-dosandu enggo nindih kam. Enggo itadingkenndu TUHAN, igombangindu Dibata si Badia nu Israel, janah enggo itundalkenndu Ia.

⁵Engkai maka lalap kam berontak? Terberaten kin atendu kam iukum? O Israel, takalndu enggo ugahen kerina, janah pusuh ras ukurndu enggo penakiten.

⁶I tapak-tapak nahendu nari terus ku piserenndu lanai lit si melikas. Dagingndu dem alu bekas lintang si mesui ras luka-luka. Ugahndu langa ibersihken, langa itambari alu minak janah langa ibaluti.

⁷Negerindu enggo ikernepken, janah kuta-kutandu enggo iciluk. I lebe-lebe matandu bangsa si deban muat tanehndu, janah kerina si lit i je iradaskenna.

⁸Jerusalem nari ngenca tading, tapi kuta e pe enggo terkepung dingen lanai ergegeh, bali ras sapo terulang i tengah peken anggur tah pe bagi pantar i tengah juma.

⁹Adi TUHAN si Mada Kuasa la nerapkenca, tentu kuta Jerusalem pe enggo keri kal kernep, bali ras Sodom ras Gomora. [2†]

¹⁰O Jerusalem peminpin-peminpinndu ras kalak si ringan i je bali ras Sodom ras Gomora. Genduari begikenlah kai si ikataken TUHAN man bandu; perdiatekenlah kai si iajarken Dibatanta man bandu.

¹¹Nina TUHAN, “Akapndu kin ngena ateKu kerina persembahen si la erngadi-ngadi ipersembahkenndu man bangKu e? Enggo medu Aku biri-biri si itutungndu jadi persembahen, bage pe tabeh-tabeh asuh-asuhenndu si mbur. Enggo leja Aku nandangi dareh lembu, dareh biri-biri ras dareh kambing e. [3†]

¹²Ise nuruhsa maba persembahen e kerina asum kam reh nembah Aku? Ise nuruhsa kam ndedeh kesain Rumah PertotonKu?

¹³La lit gunana kam maba persembahen. Mutah ateKu nganggeh bau kumenen si itutungndu. Ciga ateKu ngidah kerja meriah si ibahanndu guna ngerayaken Bulan Mbaru, wari Sabat, ras kepulungenndu i bas kebakti-kebaktin. Kerina e enggo macik erkiteken dosa-dosandu.

¹⁴Nembeh ateKu nandangi wari raya Bulan Mbaru ras wari-wari raya si deban. Kerina si e jadi babanKu si mberat man bangKu, janah enggo latih Kuakap mabasa.

¹⁵Adi iangkatndu tanndu ertoto, mintes Kupudiken. Aminna uga gia buena pertotonndu la Aku nggit megikenca, sabap alu tanndu enggo nterem kam ngamburken dareh kalak.

¹⁶Peridilah bandu maka kam bersih. Ngadikenlah erbahan kejahaten i adep-adepenKu. Olanai bahan si la mehuli,

¹⁷tapi erlajarlah erbahan si bujur. Usahakenlah maka keadilen idalanken, sampati kalak si itindes, berekenlah man anak melumang kai si jadi sikerajangenna, janah belalah hak diberu-diberu balu-balu.”

¹⁸Tole nina TUHAN, “Marilah maka si dungi cakapta enda. Kam enggo erkubang-kubang ibahan dosa, tapi kuperidi kam maka bersih bagi salju. Aminna gia erkiteken dosandu kam enggo mbiring bagi tengguang, mulihi kam jadi mbentar bagi kapas.

¹⁹Adi kam erkemalangen man bangKu, ipanndu me kai si mehuli ulih tanehndu enda.

²⁰Tapi adi ilawanndu Aku, mate me kam ipan pedang,” bage nina TUHAN.

²¹Andiko, kuta si nai patuh, genduari enggo bagi diberu perlua-lua langkahna! Nai kuta e dem alu kalak bujur, tapi genduari kalak pemunuh ringan i je.

²²O Jerusalem, nai kam bagi pirak, tapi genduari lanai lit ergandu. Nai kam bagi anggur si mehuli, tapi genduari lau nari ngenca.

²³Peminpin-peminpinndu enggo jadi pemberontak janah erteman ras pinangko; kerinana ia ngaloken sogok, janah rangap nandangi pemere kalak. La pernah ibelana anak melumang i bas pengadilen, janah la ia nggit megiken pengadun diberu balu-balu.

²⁴Erkiteken si e, begikenlah genduari kai nina TUHAN si Mada Kuasa, Dibata Israel si mbisa, “Erbalas ateKu man bandu, o kam imbang-imbangKu, maka olanai isuhsahindu Aku.

²⁵Kubahan me tindaken man bandu. Desken ngelebur timah gelah murni, bage me pe kam Kumurniken. Kerina tembesindu Kuagui.

²⁶Kubereken man bandu penguasa-penguasa ras penasehat-penasehat bagi si nai. Kenca bage Jerusalem igelari kuta si bujur dingen tutus.”

²⁷Erkiteken TUHAN bujur, ikeliniNa Jerusalem ras kerina kalak si jera si ringan i je.

²⁸Tapi kerina kalak si erbahan dosa ras berontak man baNa iripukkenNa. IsasapkenNa kerina kalak si nadingken Ia.

²⁹La banci lang erkadiola kam denggo erkiteken kam pernah nembah man batang-batang kayu janah ipersembahkenndu peken-peken man dibata-dibata si deban.

³⁰Sabap melus me kam bagi kayu si nandangi mate, bagi peken si la dat lau.

³¹Bagi nggala meseng erkiteken bincar api si kitik, bage me kalak si erkuasa kernep erkiteken perbahanenna si jahat, janah ise pe la ngasup ngambatisa.