Read Batak Karo JESAYA 10 Bible Online

JESAYA 10 - Batak Karo bible

JESAYA 10

¹Cilaka me kam! Ibahanndu undang-undang si la bujur lako nindes bangsaKu.

²Bage me perbahanenndu gelah kalak musil la ndatken hak ras keadilen. Bage me perbahanenndu lako ngerampas erta-erta diberu balu-balu ras anak melumang.

³Kai nari pagi ibahanndu tupung Dibata ngukum kam? Kai nari ibahanndu tupung iberekenNa mara i bas negeri si ndauh nari? Ku ja nari kam kiam ndarami penampat? Ku ja nari ibunikenndu kebayakenndu e?

⁴Lanai lit dalanndu pulah, seakatan mate i bas peperangen tah pe isaren-saren kalak jadi tabanen. Tapi amin enggo pe bage, pernembeh ate TUHAN langa ngadi; iawatkenNa denga tanNa lako ngukum bangsa e.

⁵Nina TUHAN, “Assur Kupake desken perpalu nggudam kalak si nembeh ateKu. [21†]

⁶Kusuruh Assur nerang bangsa si la mbiar bangKu, bangsa si mahanca ateKu gara. Kusuruh Assur ngerampasi, nangkoi ras ndedehi bangsa e desken kubang i bas dalan.”

⁷Tapi raja Assur la bage sura-surana. Ipakena atena kinimbisanna ngkernepken melala bangsa.

⁸Alu gombangna nina, “Kerina puanglimangku raja-raja kap!

⁹Ma enggo kutaluken kuta Kalno bali ras Karkemis, kuta Hamat bali ras Arpad? Enggo kutaluken Samaria bali ras Damaskus.

¹⁰Kerajan-kerajan si nembah man berhala-berhala enggo kutaluken; kerajan-kerajan e buen berhalana asa si lit i Jerusalem ras Samaria.

¹¹Samaria ras kerina berhalana enggo kukernepken; janah bage ka me kubahan nandangi Jerusalem ras kerina gana-gana si isembah i bas kuta e.”

¹²Tapi nina TUHAN, “Adi enggo dung dahinKu i Deleng Sion ras i Jerusalem, Kuukum raja Assur perban megombang dingen meganjang ukurna.”

¹³Alu megombang nina raja Assur ngerana, “Kerina si e enggo kubahan alu gegehku jine. Aku megegeh, pentar ras beluh; kumasapken baleng negeri-negeri janah kurampas perbekalen si lit i bas lumbungna. Desken raksasa kudedehi kerina penduduk negeri e.

¹⁴Bangsa-bangsa i bas doni desken sada asar perik; kupepulung kebayaken bangsa-bangsa e bali murahna ras pepulung naruh i bas asar-asar. Sada pe la pang erkepek, sada pe la pang kumekik.”

¹⁵Tapi nina TUHAN, “Banci kin ikataken kapak belinen ia asa si makesa? Pentingen kin gaji asa kalak si nggajikenca? Perpalu labo banci ngawatken jelma; jelma nge ngawatken perpalu.”

¹⁶ TUHAN si Mada Kuasa namaken penakit lako ngukum puanglima-puanglima si mbur genduari. Melas pagi akapna i bas kulana si mbur e, tempa-tempa i je lit api si gurlah la erngadi-ngadi.

¹⁷Dibata, terang Israel, jadi api pagi. Dibata si Badia nu Israel jadi dilah api, janah sada wari saja keri icilukna kerina si nasa lit, subuk dukut si erduri bage pe rambah erduri.

¹⁸Kerangen si mbelang, juma si mehumur ikernepken kerina, bali ras penakit si mekelek ngkernepken sekalak jelma.

¹⁹Sitik nari ngenca pagi batang kayu si tading seh maka sekalak danak-danak pe ngasup meligaisa.

²⁰Lit pagi paksana i ja kalak Israel si tading denga lanai ernalem man bangsa si menam ngkernepken ia. Tupung e tuhu-tuhu ia ernalem man TUHAN, Dibata si Badia nu Israel.

²¹Piga-piga i bas kalak Israel mulihken pagi tek kempak Dibatana si mbisa.

²²Aminna gia genduari kalak Israel bali buena ras kersik i tepi lawit, piga-piga kalak saja ngenca pagi si mulihken. Bangsa e lanai banci lang ikernepken janah patut kal bage ibahan man bana. [22†]

²³Tuhu, TUHAN si Mada Kuasa, si Erdolat, la banci lang engkernepken kerina negeri e, sue ras si enggo ikatakenNa.

²⁴ TUHAN si Mada Kuasa si Erdolat ngerana man bangsaNa si ringan i Sion nina, “Ola kam mbiar nandangi kalak Assur e aminna gia itindes dingen isega-segana kam bali ras perbahanen kalak Mesir nai.

²⁵Enggo me bias ukumen si Kubereken man bandu, janah kenca bage Kukernepken me bangsa Assur e.

²⁶Aku, TUHAN si Mada Kuasa, tentu ngeligas bangsa e alu perligasKu, bali ras pengeligasKu bangsa Midian i Batu Oreb. Kuukum me Assur bali ras Kuukum Mesir nai.

²⁷Adi paksa si e enggo seh, Kubebasken me kam i bas kuasa Assur nari, janah pasangen si mberat si itamakenna i bas kudukndu Kupenggelken me.”

²⁸Tentera musuh enggo naluken kuta Ai! Enggo ibentasina kuta Migron! Perbekalenna itadingkenna i Mikmas!

²⁹Enggo ikeparina dalan si sempit i babo deleng, jenari erberngi ia i Geba. Kalak si ringan i Rama gentar kerina, janah penduduk kuta Raja Saul e me Gibea enggo ngerbul.

³⁰Serkolah, o anak kuta Gallim! Begiken o anak kuta Laisa! Aloilah o anak kuta Anatot!

³¹Penduduk kuta Madmena ras Gebim enggo kiam lako ngkelini kesahna.

³²Sendah musuh enggo ngkuasai kuta Nob, janah i bas kuta e ianjuna tinju-tinjuna kempak Deleng Sion, ku kuta Jerusalem.

³³Kerina kuta enda ndai iruntuhken TUHAN si Mada Kuasa desken dahan-dahan si ikeret i bas batang kayu nari. Si meganjangna ras si megegehna ituhtuhi janah idabuhken.

³⁴Desken kayu i tengah kerangen itabah alu kapak, bage me ia kerina itabah TUHAN. Janah aminna paguh pe ia bagi kayu asis Libanon, ampar nge ia ibahan TUHAN.