Read Batak Karo JESAYA 11 Bible Online

JESAYA 11 - Batak Karo bible

JESAYA 11

¹Kesusuren Raja Daud bali ras batang kayu si enggo itabah. Tapi bagi tunas si turah i bas tongkehna nari, bage me pe i bas kesusuren Daud nari keke sekalak raja. [23†]

²Kesah TUHAN ringan i bas ia, mereken pemeteh ras kuasa merentah rayatna. Ietehna peraten TUHAN, mehamat ia kempaksa,

³janah keriahenna, e me matuhi TUHAN. La erpalasken si teridah saja ia ngadili, tah pe erpalasken kai si ibegina;

⁴tapi alu bujur irungguina perkara kalak musil, janah ibelana kalak si tertindas. Arah perentahna kalak si ersalah iukum, janah kalak jahat ikernepken. [24†]

⁵Iperentahna rayatna alu kebujuren ras kebenaren. [25†]

⁶Serigala ras biri-biri nggeluh ras-ras alu dame, arimo tultul medem-medem ras anak kambing. Anak lembu nggagat ras anak singa, danak-danak si mpermakanisa. [26†]

⁷Lembu ras beruang ngagat ras-ras, anak-anakna pe ras medem-medem. Singa, nggala gagatenna, bali ras lembu.

⁸Anak si kitik denga la kena kai pe, aminna erguro-guro pe ia deherken nipe si erbisa.

⁹I Sion, i Deleng si Badia nu Dibata, lanai lit si ncedai tah pe kejahaten. Doni enda dem alu pemeteh kerna TUHAN bali ras lawit dem alu lau. [27†]

¹⁰Reh me warina maka raja si mbaru i bas kesusuren Raja Daud nari desken panji-panji man bangsa-bangsa. Bangsa-bangsa e reh ndahi ia janah ingan raja e jadi ingan si mulia. [28†]

¹¹Adi enggo pagi seh wari si e, ipake TUHAN ka kuasaNa sekali nari, jenari ibabaNa mulih kerina bangsaNa si tading denga i Assur ras i Mesir, i negeri-negeri Petros, Sudan, Elam, Babilon ras Hamat, bage pe i bas pulau-pulau i tengah lawit.

¹²Iangkat Tuhan me pagi sada panji-panji jadi tanda man kerina bangsa-bangsa, maka ipepulungNa me mulihi kalak Israel ras Juda si merap, janah ibabaNa mulih i belang-belang doni nari.

¹³Kerajan Israel lanai nciani kerajan Juda, janah Juda lanai perimbang ras Israel.

¹⁴Ras-ras pagi ia nerang kalak Pilisti si lit arah Barat janah ngerampasi bangsa-bangsa si lit arah Timur. Italukenna me kalak Edom ras Moap, janah kalak Amon patuh man bana.

¹⁵Ikerahi TUHAN Teluk Sues, janah isuruhNa rembus angin si melas lako ngkerahi Lau Eprat. Pitu wari ngenca pagi itadingkenNa lau anak, seh maka ise pe ngasup erdalan ngeparisa. [29†]

¹⁶Lit pagi pasar si mbelang i Assur nari jadi dalan mulih man kalak Israel si nggeluh denga i jah, bali ras dalan man nini-ninina nai asum ia nadingken Mesir.